കോവിഡ് ബാധിതരുടെ എണ്ണത്തില്‍ റഷ്യയെ മറികടന്ന് ഇന്ത്യ ലോകത്ത് മൂന്നാം സ്ഥാനത്ത്. രാജ്യത്ത് രോഗികള്‍ ഏഴുലക്ഷത്തോടടുത്തു. മരണം ഇരുപതിനായിരത്തിലേക്ക്. ഇന്ത്യയില്‍ 6,97,069 രോഗികള്‍. റഷ്യയില്‍ 6,81,251. അമേരിക്കയും ബ്രസീലും മാത്രമാണ് ഇന്ത്യക്ക് മുന്നിലുള്ളത്.അണ്‍ലോക്ക് പ്രഖ്യാപിച്ചതുമുതല്‍ കോവിഡ് വ്യാപനം തീവ്രമാണ്. ജൂലൈ ഒന്നുമുതല്‍ അണ്‍ലോക്ക് രണ്ടിന് തുടക്കമിട്ടതോടെ പ്രതിദിന രോഗികളുടെ എണ്ണത്തില്‍ വലിയ കുതിച്ചുചാട്ടമാണ്.
അഞ്ചുദിവസം പിന്നിട്ടപ്പോഴേക്കും 1.10 ലക്ഷത്തിലേറെ പുതിയ രോഗികളുണ്ടായി. അടച്ചിടല്‍ കാലയളവില്‍ രോഗവ്യാപനം കുറവായിരുന്ന കര്‍ണാടക, തെലങ്കാന, ആന്ധ്ര, ബംഗാള്‍, ബിഹാര്‍, അസം സംസ്ഥാനങ്ങളിലെല്ലാം ഏതാനും ദിവസമായി രോഗികളുടെ എണ്ണത്തിലെ വര്‍ധന ഏറ്റവുമുയര്‍ന്ന തോതിലാണ്.അടച്ചിടല്‍ ആരംഭിച്ച മാര്‍ച്ച് 25ന് 571 രോഗികളും ഒരു മരണവും മാത്രമാണുണ്ടായത്. നാലു ഘട്ടത്തിലായി മെയ് 31ന് 68 ദിവസത്തെ അടച്ചിടല്‍ അവസാനിച്ചപ്പോള്‍ രോഗികളുടെ എണ്ണം 1,90,648ല്‍ എത്തി. 5405 മരണവും. അണ്‍ലോക്ക് ആയതോടെ 35 ദിവസംകൊണ്ട് രോഗികള്‍ 1.90 ലക്ഷത്തില്‍നിന്ന് 6.85 ലക്ഷമായി. വര്‍ധന 5.07 ലക്ഷം (253 ശതമാനം) . അണ്‍ലോക്കിനു ശേഷം 13,875 പേര്‍ മരിച്ചു (257 ശതമാനം വര്‍ധന). 24 മണിക്കൂറില്‍ 24,850 രോഗബാധ റിപ്പോര്‍ട്ടു ചെയ്തതായി കേന്ദ്ര ആരോഗ്യമന്ത്രാലയം അറിയിച്ചു. ഇതാദ്യമാണ് പ്രതിദിന രോഗികള്‍ കാല്‍ലക്ഷത്തോട് അടുക്കുന്നത്.
ശനിയാഴ്ച റിപ്പോര്‍ട്ടു ചെയ്യപ്പെട്ട രോഗികളില്‍ 78 ശതമാനവും മഹാരാഷ്ട്ര, തമിഴ്നാട്, ഡല്‍ഹി, തെലങ്കാന, കര്‍ണാടക, അസം, ബിഹാര്‍ സംസ്ഥാനങ്ങളിലാണ്. 613 മരണവും ശനിയാഴ്ച റിപ്പോര്‍ട്ടു ചെയ്തു. ഒരു ദിവസം ഇത്രയധികം മരണവും ആദ്യമാണ്. ഇന്ത്യ അടച്ചില്‍ അവസാനിപ്പിച്ച മെയ് 31നു റഷ്യയില്‍ രോഗബാധിതര്‍ 4.06 ലക്ഷമായിരുന്നു. നിലവില്‍ ഇത് 6.81 ലക്ഷമാണ്.