ഭാര്യക്കു മരുന്നു വാങ്ങാന്‍ മറ്റു നിവൃത്തിയൊന്നുമില്ലാതെ ഭര്‍ത്താവ് വിറ്റത് രണ്ട് മാസം പ്രായമായ സ്വന്തം മകനെ. മൃതപ്രായയായ ഭാര്യയെ രക്ഷിക്കാന്‍ എഴുനൂറു രൂപയ്ക്കാണ് ഒഡീഷ സ്വദേശി കുഞ്ഞിനെ വിറ്റത്.
ഒഡീഷയിലെ മല്‍കാന്‍ഗിരി ജില്ലയിലെ ചിട്ടപള്ളി ഗ്രാമത്തിലാണു സംഭവം. സുകുരാ മുദുലിയും ഭാര്യ ധുംസി മുദുലിയുമാണ് മരുന്നു വാങ്ങാന്‍ പണമില്ലാത്തതിനാല്‍ സ്വന്തം കുഞ്ഞിനെ വില്‍ക്കേണ്ടി വന്നത്.
700 രൂപയ്ക്കാണു കുഞ്ഞിനെ മറ്റൊരു സ്ത്രീയ്ക്കു കൈമാറിയതെന്നു മല്‍കാന്‍ഗിരി ശിശുക്ഷേമ സമിതി അധ്യക്ഷന്‍ സഞ്ജുക്ത പ്രധാന്‍ പറഞ്ഞു. സംഭവം അറിഞ്ഞ ജില്ലാ കലക്ടര്‍ ഡി പ്രശാന്ത് കുമാര്‍ റെഡ്ഡി അന്വേഷണത്തിനായി ശിശുക്ഷേമസമിതിയെ ചുമതലപ്പെടുത്തുകയായിരുന്നു.
സര്‍ക്കാരിന്റെ ദാരിദ്ര്യ നിര്‍മ്മാര്‍ജന പദ്ധതികളിലോ മറ്റു ക്ഷേമപദ്ധതികളിലോ ഈ കുടുംബം അംഗമായിരുന്നില്ലെന്നും പട്ടിണിയും സാമ്പത്തിക പ്രതിസന്ധിയുമാണു കുഞ്ഞിനെ വില്‍ക്കാന്‍ ഇവരെ പ്രേരിപ്പിച്ചതെന്നും സഞ്ജുക്ത പ്രധാന്‍ പറഞ്ഞു. കുഞ്ഞിനെ വിറ്റുകിട്ടിയ പണംകൊണ്ടു സുകുരാ മുദുലി ഭാര്യയ്ക്കു മരുന്നും മറ്റ് ഭക്ഷ്യധാന്യവും വാങ്ങിയെന്ന് അന്വേഷണത്തില്‍ വ്യക്തമായി. ശിശുക്ഷേമ സമിതി ഏറ്റെടുത്ത കുട്ടിയുടെ പരിചരണം താല്‍ക്കാലികമായി ആരോഗ്യപ്രവര്‍ത്തകയെ ഏല്‍പ്പിച്ചിരിക്കുകയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha