ബ്രഹ്മപുത്ര നദിക്കടിയിലൂടെ തന്ത്രപ്രധാനമായ തുരങ്കം നിര്‍മിക്കാന്‍ കേന്ദ്രം തത്വത്തില്‍ അനുമതി നല്‍കി. അസമിലെ ഗോഹ്പുര്‍ നുമാലിഗഢ് നഗരങ്ങളെ ബന്ധിപ്പിച്ചുള്ള നാലുവരിപ്പാതയാണ് തുരങ്കത്തിലൂടെയുണ്ടാവുക. നദിക്കടിയിലൂടെയുള്ള ഇന്ത്യയിലെ ആദ്യത്തെ തുരങ്കമായിരിക്കും ഇത്. ചൈന ജിയാങ്‌സു പ്രവിശ്യയില്‍ തൈഹു നദിക്കടിയില്‍ പണിയുന്ന തുരങ്കത്തേക്കാള്‍ നീളമേറിയതാണിത്.

മാത്രമല്ല, ചൈനീസ് അതിര്‍ത്തിയോടു ചേര്‍ന്നുള്ള ഈ തുരങ്കത്തിലൂടെ അസമും അരുണാചല്‍ പ്രദേശും തമ്മില്‍ വര്‍ഷം മുഴുവന്‍ പരസ്പരം ബന്ധപ്പിക്കാനും കഴിയും. തന്ത്രപ്രധാനമായ ഈ തുരങ്കപാതയിലൂടെ സൈനിക ആവശ്യങ്ങളും ആയുധങ്ങളും അടക്കമുള്ളവ വാഹനങ്ങളില്‍ 80 കിലോമീറ്റര്‍ വേഗത്തില്‍ കൊണ്ടുപോകാനും കഴിയും.

അമേരിക്കന്‍ കമ്പനിയായ ലൂയി ബഗ്‌റിനൊപ്പം നാഷനല്‍ ഹൈവേസ് ആന്‍ഡ് ഇന്‍ഫ്രാസ്ട്രക്ചര്‍ ഡെവലപ്‌മെന്റ് കോര്‍പ്പറേഷന്‍ ലിമിറ്റഡ് (എന്‍എച്ച്എഐഡിസിഎല്‍) ആണ് തുരങ്കം നിര്‍മിക്കുന്നത്. അതേസമയം, ഈ പദ്ധതിക്ക് കേന്ദ്രം മാര്‍ച്ചില്‍ത്തന്നെ അനുമതി നല്‍കിയിരുന്നതാണെന്നാണ് ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നത്.

14.85 കിലോമീറ്റര്‍ ടണലിന്റെ നിര്‍മാണം ഡിസംബറില്‍ ആരംഭിക്കും. മൂന്ന് ഘട്ടങ്ങളായാണ് നിര്‍മാണം. ചൈന നിര്‍മിക്കുന്ന ടണലിന് 10.79 കിലോമീറ്ററാണ് നീളം.

ഇംഗ്ലിഷ് ചാനലിനു കീഴിലൂടെയുള്ള തുരങ്കപാത പോലെ ബ്രഹ്മപുത്രയ്ക്കു കീഴിലും വേണമെന്ന് സൈന്യമാണ് കേന്ദ്രത്തോട് ആവശ്യപ്പെട്ടത്. പാലം പണിതാല്‍ അവ ശത്രുക്കളുടെ ആക്രമണത്തിനു പാത്രമാകുമെന്നതും തുരങ്കപാത പദ്ധതിക്കു പ്രേരകമായി.

ഗല്‍വാന്‍, ഹോട് സ്പ്രിങ്‌സ്, ഗോഗ്ര ഹൈറ്റ്‌സ് എന്നിവിടങ്ങളില്‍ നിന്നു നേരിയതോതില്‍ പിന്മാറിയെങ്കിലും സംഘര്‍ഷം പൂര്‍ണമായി പരിഹരിക്കാനുള്ള ആത്മാര്‍ഥ നടപടികള്‍ ചൈന ഇനിയും സ്വീകരിച്ചിട്ടില്ല. പിന്മാറിയ സ്ഥലത്ത് ഇരു സേനകളും തല്‍ക്കാലം പട്രോളിങ് നിര്‍ത്തിവച്ചിരിക്കുകയാണ്. താല്‍ക്കാലിക പിന്മാറ്റത്തിന്റെ മറവില്‍, അവിടെ ഇന്ത്യയുടെ പട്രോളിങ് എന്നെന്നേയ്ക്കുമായി അവസാനിപ്പിക്കാനും ഭാവിയില്‍ പ്രദേശത്ത് അവകാശം സ്ഥാപിക്കാനുമുള്ള ഗൂഢശ്രമമാണു ചൈന നടത്തുന്നതെന്നു സേനാ വൃത്തങ്ങള്‍ പറയുന്നു.ഈ സാഹചര്യത്തിലുള്ള ഇന്ത്യയുടെ പുതിയ നീക്കം ഇന്ത്യന്‍ പ്രതിരോധ തന്ത്രങ്ങള്‍ക്ക് കൂടുതല്‍ കരുത്തേകും എന്നുറപ്പാണ്