കോവിഡ് എന്ന മാരക വൈറസ് കവര്‍ന്നെടുത്ത ജീവിതങ്ങള്‍ അനവധിയാണ്. പ്രിയപ്പെട്ടവരെ ഒന്ന് കാണാനോ തൊടാനോ പറ്റാതെ, അവസാന നിമിഷങ്ങളില്‍ പോലും പരിചരിക്കാനാവാതെ മണ്മറഞ്ഞുപോയവര്‍ നിരവധിയാണ്. ഈ കോവിഡ് കാലത്ത് വേദനയും അതേ സമയം അഭിമാനവും സമ്മാനിക്കുകയാണ് സമൂഹമാധ്യമങ്ങളില്‍ വൈറലായ ഒരു ചിത്രം. കോവിഡ് ബാധിച്ച് ഗുരുതരാവസ്ഥയിലായ അമ്മയെ കാണാന്‍ എന്നും ജനലിന്റെ വശത്ത് വന്നിരിക്കും ഈ മകന്‍. ബെയ്ത്ത്അവ സ്വദേശിയായ ഈ പാലസ്തീനി യുവാവ് ഈ ജനാലയിലൂടെ അമ്മയുടെ അവസാനനിമിഷങ്ങള്‍ക്കും സാക്ഷിയായി. ഈ മകനെ ഓര്‍ത്ത് ആ അമ്മയുടെ ആത്മാവ് സന്തോഷത്തോടെ അഭിമാനിക്കും എന്നാണ് പലരും ചിത്രം പങ്കുവച്ച് കുറിക്കുന്നത്.
73 കാരിയായ അമ്മ റസ്മി സുവൈതി ആശുപത്രിയിലായ ശേഷം എന്നും 30കാരനായ മകന്‍ കാണാനെത്തും. കോവിഡ് നിയന്ത്രണങ്ങളുണ്ടായത് കൊണ്ട് അമ്മ കിടക്കുന്ന മുറിയുടെ ജനാലയില്‍ ഇരുന്നാണ് അമ്മയെ കാണുന്നത്. അമ്മയെ തൊടാനോ സംസാരിക്കാനോ കഴിഞ്ഞില്ലെങ്കിലും മണിക്കൂറുകളോളം നോട്ടം കൊണ്ട് ഈ മകന്‍ അമ്മയെ പരിചരിച്ചു. അമ്മയുടെ മരണം വരെ ആശുപത്രിയുടെ കെട്ടിടത്തില്‍ വലിഞ്ഞുകയറി ആ ജനാലയ്ക്കരില്‍ ഈ മകന്‍ സ്ഥാനം പിടിച്ചിരുന്നു.

ബ്ലഡ് കാന്‍സറിന് ചികിത്സയിലിരിക്കുമ്പോഴാണ് കോവിഡ് റസ്മി സുവൈതിയെ പിടികൂടുന്നത്. അമ്മയ്‌ക്കൊപ്പം ആശുപത്രിയുടെ അകത്ത് നില്‍ക്കാന്‍ അനുവാദം തേടിയിരുന്നെങ്കിലും ലഭിച്ചില്ല. ഇതോടെയാണ് കെട്ടിടത്തിന് പുറത്തൂടെ കയറി ജനാലയ്ക്ക് സമീപം മകന്‍ സ്ഥാനം പിടിച്ചത്. നിസഹായനായി ഞാന്‍ ആ ജനാലക്ക് പുറത്തിരുന്നു, അമ്മയുടെ അവസാന നിമിഷങ്ങള്‍ കണ്ടുകൊണ്ട്. ആശുപത്രിയില്‍ കടക്കാന്‍ ശ്രമിച്ചിരുന്നു. പക്ഷെ അനുവാദം ലഭിച്ചില്ല. അവസാനമായി അമ്മയെ ഒന്ന് കാണാനാണ് ഞാന്‍ ജനാലയുടെ മുകളില്‍ കയറിയത്', മകന്റെ വാക്കുകള്‍ ഇങ്ങനെ.
നിര്‍ന്നിമേഷനായി അമ്മയെയും നോക്കിജനാലയുടെ അരികിലിരിക്കുന്ന ആ മകന്റെ ചിത്രം ആയിരക്കണക്കിനാളുകളാണ് സമൂഹമാദ്ധ്യമങ്ങളില്‍ പങ്കുവച്ചത്. യു.എന്‍ പ്രതിനിധിയും പേട്രിയോടിക് വിഷന്‍ സി.ഇ.ഒയുമായ മുഹമ്മദ് സഫയും ചിത്രം ട്വിറ്ററില്‍ പങ്കുവച്ചിട്ടുണ്ട്.