ഉത്തര്‍പ്രദേശില്‍ യോഗി ആദിത്യനാഥ് സര്‍ക്കാര്‍ വാഗ്ദാനം ചെയ്തത് രാമരാജ്യമാണെങ്കിലും നടക്കുന്നത് ഗുണ്ടാരാജാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. ഗാസിയാബാദില്‍ മാധ്യമപ്രവര്‍ത്തകന്‍ വെടിയേറ്റ് മരിച്ച സംഭവത്തിലാണ് ഉത്തര്‍പ്രദേശ് സര്‍ക്കാരിനെ രൂക്ഷമായി വിമര്‍ശിച്ച് അദ്ദേഹം രംഗത്ത് എത്തിയത്. തന്റെ ട്വീറ്ററിലൂടെയാണ് രാഹുല്‍ ഗാന്ധിയുടെ വിമര്‍ശനം.

ഗാസിയാബാദില്‍ അക്രമി സംഘത്തിന്റെ വെടിയേറ്റ് ഗുരുതരാവസ്ഥയില്‍ കഴിയുകയായിരുന്ന മാധ്യമപ്രവര്‍ത്തകന്‍ വിക്രം ജോഷി ഇന്ന് പുലര്‍ച്ചെയാണ് മരിച്ചത്. ഇന്നലെ രാത്രി പത്തരയോടെയാണ് രാജ്യത്തെയാകെ നടുക്കിയ സംഭവമുണ്ടായത്. പെണ്‍മക്കള്‍ക്കൊപ്പം ബൈക്കില്‍ സഞ്ചരിക്കുകയായിരുന്നു വിക്രം ജോഷി. ഇതിനിടെ കാറിലെത്തിയ സംഘം ഇവരെ തടഞ്ഞു. തുടര്‍ന്ന് വാഹനം മറിച്ചിട്ട ആക്രമി സംഘം വിക്രമിനെ മര്‍ദ്ദിച്ചു. തുടര്‍ന്ന് കാറിനോട് ചേര്‍ത്ത് വച്ച് തലയ്ക്ക് വെടിവച്ചു. നടുറോഡില്‍ മറ്റുള്ളവര്‍ നോക്കി നില്‍ക്കെയായിരുന്നു ആക്രമണം. പരിക്കേറ്റു കിടക്കുന്ന പിതാവിനെ ആശുപത്രിയിലെത്തിക്കാന്‍ പെണ്‍കുട്ടികള്‍ സഹായം അഭ്യര്‍ത്ഥിക്കുന്നതിന്റെ അടക്കമുള്ള ദൃശ്യങ്ങള്‍ നേരത്തെ പുറത്തു വന്നിരുന്നു.

തന്റെ ബന്ധുവായ പെണ്‍കുട്ടിയെ അപമാനിച്ച പ്രതികള്‍ക്കെതിരെ വിക്രം പോലീസില്‍ പരാതി നല്‍കിയിരുന്നു. ഇതാണ് ആക്രമണത്തിന് കാരണമെന്നാണ് പോലീസ് പറയുന്നത്. എന്നാല്‍ പരാതി ലഭിച്ചിട്ടും പോലീസ് കേസ് എടുത്തിരുന്നില്ല. ആക്രമണത്തില്‍ പ്രതിഷേധം ഉയര്‍ന്നതോടെ പരാതിയില്‍ നടപടി സ്വീകരിക്കാത്തതിന് രണ്ട് പോലീസുകാരെ സസ്‌പെന്റ് ചെയ്തിരുന്നു. വിക്രം ജോഷിയെ ആക്രമിച്ച സംഭവത്തില്‍ ഒമ്പത് പേരെ യുപി പോലീസ് പിടികൂടിയിട്ടുണ്ട്. ആക്രമണത്തിന് ഗൂഢാലോചന നടത്തിയവര്‍ ഉള്‍പ്പടെ ഒമ്പത് പേരാണ് ഇതുവരെ പിടിയിലായത്. എന്നാല്‍ മുഖ്യപ്രതി ഇപ്പോഴും ഒളിവിലാണ്. ഇയാളെ കണ്ടെത്താന്‍ പ്രത്യേക അന്വേഷണ സംഘത്തെ നിയോഗിച്ചതായി യു.പി പോലീസ് അറിയിച്ചു.

മുമ്പ് വികസ് ദുബൈയെയും സംഘത്തെയും വിവിധ ഇടങ്ങളിലായി വെടുവച്ചു കൊന്നതിലും ഒരെ സമയം പ്രതിഷേധവും അനുമോദനവും യു.പി പോലീസ് ഏറ്റുവാങ്ങിയിരുന്നു. വികാസ് ദുബൈയെ പിടിക്കാന്‍ വന്ന എട്ടു പോലീസുകാരെയാണ് ഇയാളും സംഘവും വെടിവച്ചു കൊന്നത്. അന്ന് കോണ്‍ഗ്രസ് ജനറല്‍ സെക്രട്ടറി പ്രിയങ്കാ ഗാന്ധി പോലീസിന്റെ വീഴ്ചയെ കുറ്റപ്പെടുത്തിയിരുന്നു. എന്നാല്‍ ഇതിന് എന്‍കൗണ്ടറിലൂടെയാണ് പോലീസ് മറുപടി നല്‍കിയത്. പക്ഷേ ഇത് കോടതിയുടെ വിമര്‍ശനത്തിനും പിന്നീട് അന്വേഷണത്തിനും വഴി വച്ചിരുന്നു.