പൈതലിനോട് കണ്ണില്ലാത്ത കൊടും ക്രൂരത; 40 ദിവസം മാത്രം പ്രായമായ പെണ്കുഞ്ഞിനെ മാതാപിതാക്കള് കിണറ്റിലെറിഞ്ഞ് കൊന്നു
40 ദിവസം മാത്രം പ്രായമായ പെണ്കുഞ്ഞിനെ മാതാപിതാക്കള് കിണറ്റിലെറിഞ്ഞ് കൊന്നു. ആണ്കുഞ്ഞിനെ ആഗ്രഹിച്ചപ്പോൾ പെണ്കുഞ്ഞ് ജനിച്ചതിന്റെ നിരാശയിലാണ് കൊലപാതകം.
ഉത്തര കന്നഡ ജില്ലയിലെ യെല്ലാപുരയിലുള്ള സിര്സി നഗരത്തിലാണ് മാതാപിതാക്കളുടെ കൊടുംക്രൂരത. 40 ദിവസം പ്രായമുള്ള തനുശ്രീ എന്ന കുഞ്ഞിനെയാണ് ജന്മം നല്കിയവര് തന്നെ കിണറ്റിലെറിഞ്ഞു കൊന്നത്. സംഭവവുമായി ബന്ധപ്പെട്ട് കുട്ടിയുടെ അച്ഛന് ചന്ദ്രശേഖര് ഭട്ട് (42), അമ്മ പ്രിയങ്ക (21) എന്നിവരെ പോലീസ് അറസ്റ്റ് ചെയ്തു. പെണ്കുഞ്ഞിനെ വേണ്ടാത്തതിനാലാണ് കാലപ്പെടുത്തിയതെന്ന് ഇവര് പൊലീസിന് മൊഴി നല്കി.
ഓഗസ്റ്റ് രണ്ടിനാണ് സംഭവം. കുഞ്ഞിന്റെ അമ്മയുടെ സഹോദരനായ അഭിഷേക് ജഗദീഷാണ് സംഭവം പുറത്തെത്തിച്ചത്. ഇദ്ദേഹം യെല്ലാപുര പോലീസില് പരാതി നല്കിയതിനെ തുടര്ന്ന് നടത്തിയ അന്വേഷണത്തിലാണ് കൊലപാതകം പുറംലോകം അറിഞ്ഞത്.
സംഭവ ദിവസം പുലര്ച്ചെ രണ്ടരയോടെ ഉണര്ന്നപ്പോള് കുഞ്ഞിനെ കാണാനില്ലെന്ന് പ്രിയങ്ക പറഞ്ഞു. ഇതോടെ ബന്ധുക്കള് തിരച്ചില് നടത്തി. പിന്നീട് കുട്ടിയുടെ മൃതദേഹം കിണറ്റില് കണ്ടെത്തുകയായിരുന്നു. സംശയം തോന്നി ചോദ്യം ചെയ്തതോടെ പ്രിയങ്ക കുറ്റം സമ്മതിക്കുകയായിരുന്നു. ഇരുവരെയും കോടതിയില് ഹാജരാക്കി.
https://www.facebook.com/Malayalivartha