സ്വാതന്ത്ര്യ ദിന ആഘോഷങ്ങള്‍ ആരംഭിക്കാന്‍ മണിക്കൂറുകള്‍ മാത്രം ബാക്കി നില്‍ക്കെ രാജ്യത്തെ അഭിസംബോധന ചെയ്ത് രാഷ്ട്രപതി രാംനാഥ് കോവിന്ദ്. കൊവിഡ് സാഹചര്യം മൂലം ഇത്തവണത്തെ സ്വന്തന്ത്ര്യ ദിനാഘോഷങ്ങള്‍ക്ക് നിയന്ത്രണങ്ങള്‍ ഉണ്ടാകുമെന്ന് രാഷ്ട്രപതി വ്യക്തമാക്കി.

കൊവിഡ് രോഗത്തിനെതിരെയുള്ള ആരോഗ്യ പ്രവര്‍ത്തകരുടെ പോരാട്ടത്തിന് രാജ്യം അവരോട് അങ്ങേയറ്റം കടപ്പെട്ടിരിക്കുന്നുവെന്നും അദ്ദേഹം പറഞ്ഞു. കൊവിഡ് രോഗബാധയുടെ സാഹചര്യം എല്ലാത്തരം പ്രവര്‍ത്തനങ്ങളെയും പ്രതികൂലമായി ബാധിച്ചുവെന്നും രോഗവ്യാപനം വലിയ ആഘാതമാണ് സൃഷ്ടിച്ചുള്ളത്.

കൊവിഡ് ഉയര്‍ത്തിയ വെല്ലുവിളികള്‍ക്കെതിരെ കേന്ദ്ര സര്‍ക്കാര്‍ മനുഷ്യാതീതമെന്നവണ്ണമാണ് നടപടികള്‍ കൈക്കൊണ്ടതെന്നും ഇതുമൂലം നമ്മുക്ക് രോഗത്തിനുമേല്‍ നിയന്ത്രണം നേടാന്‍ കഴിഞ്ഞുവെന്നും രാജ്യത്തെ ഒട്ടനവധി ജനങ്ങളുടെ ജീവനുകള്‍ രക്ഷിക്കാനായെന്നും അദ്ദേഹം പറഞ്ഞു. ഇതുവഴി ലോകത്തിനുതന്നെ മാതൃകയായി മാറാന്‍ ഇന്ത്യക്ക് കഴിഞ്ഞുവെന്നും അദ്ദേഹം അഭിപ്രായപ്പെട്ടു. രാജ്യത്തെ ആരോഗ്യപ്രവര്‍ത്തകര്‍ തങ്ങളുടെ കഴിവിനും അപ്പുറം രോഗത്തിനെതിരെ പോരാടിയെന്നും ആവശ്യസേവനങ്ങള്‍ ഉറപ്പാക്കുന്നതിലൂടെ ജീവനുകള്‍ രക്ഷിച്ചുവെന്നും അദ്ദേഹം പറഞ്ഞു.

അഭിസംബോധനയ്ക്കിടെ അയോദ്ധ്യയിലെ രാമക്ഷേത്ര നിര്‍മാണത്തെക്കുറിച്ചും അദ്ദേഹം സൂചിപ്പിച്ചു. പത്ത് ദിവസങ്ങള്‍ക്ക്ക് മുന്‍പ് ആരംഭിച്ച രാമക്ഷേത്രത്തിന്റെ നിര്‍മാണത്തില്‍ ഇന്ത്യക്കാര്‍ അഭിമാനിക്കുന്നുവെന്ന് അദ്ദേഹം പറഞ്ഞു.

'ഇന്ത്യയ്ക്ക് സ്വയംപര്യാപ്തത' എന്ന പ്രധാനമന്ത്രിയുടെ പ്രസ്താവനയെയും അദ്ദേഹം ശ്ലാഘിച്ചു. ഇന്ത്യയുടെ സ്വയംപര്യാപ്തത എന്നാല്‍ ആരെയും അകറ്റിനിര്‍ത്താതെയും ലോകത്തില്‍ അകല്‍ച്ചകള്‍ സൃഷ്ടിക്കാതെയുമുള്ള സ്വാശ്രയത്വമാണെന്നും അദ്ദേഹം പറഞ്ഞു.