പ്രശസ്ത പര്‍വതാരോഹകന്‍ അങ് റിത ഷെര്‍പ്പ (72) അന്തരിച്ചു. മഞ്ഞുമലയിലെ പുള്ളിപ്പുലി എന്നറിയപ്പെടുന്ന റിത ഓക്‌സിജന്‍ സിലിണ്ടറില്ലാതെ 10 തവണ എവറസ്റ്റ് കീഴടക്കിയ ഈ രംഗത്തെ സൂപ്പര്‍മാനാണ്.

റിതയുടെ വിഖ്യാതമായ എവറസ്റ്റ് യാത്രകള്‍ 1983-നും 1996-നുമിടയിലായിരുന്നു. റിത ഷെര്‍പ്പയുടെ ധീരമായ ഹിമയാത്രകള്‍ എവറസ്റ്റ് എന്ന സ്വപ്നവുമായി നേപ്പാളിലേക്ക് വരുന്ന ലോകമെമ്പാടുമുള്ള പര്‍വതാരോഹകരെ പ്രചോദിപ്പിച്ചിരുന്നു .

ഏറ്റവും കൂടുതല്‍ തവണ ഓക്‌സിജന്‍ സിലിണ്ടറില്ലാതെ 8848 മീറ്റര്‍ ഉയരമുള്ള എവറസ്റ്റ് കൊടുമുടി കയറിയതിന്റെ ഗിന്നസ് റെക്കോര്‍ഡ് റിതയുടെ പേരിലാണ്.

1987 ഡിസംബറിലെ കൊടുംമഞ്ഞുകാലത്തും പര്‍വതരാജാവിന്റെ നെറുകയില്‍ ചുംബിക്കാന്‍ റിതയ്ക്കു കഴിഞ്ഞു. എവറസ്റ്റ് കീഴടക്കിയ റിതയുടെ റെക്കോര്‍ഡ് പിന്നീട് പലരും മറികടന്നിട്ടുണ്ടെങ്കിലും ചരിത്രത്തിന്റെ തലയെടുപ്പ് റിതയ്‌ക്കൊപ്പമാണ്.