അവശ്യസാധന (ഭേദഗതി) ബില്‍ 2020 രാജ്യസഭ പാസാക്കി. ധാന്യങ്ങള്‍, പയറുവര്‍ഗങ്ങള്‍, എണ്ണക്കുരുക്കള്‍, ഭക്ഷ്യഎണ്ണ, ഉള്ളി, ഉരുളക്കിഴങ്ങ് എന്നിവയെ അവശ്യസാധനങ്ങളുടെ പട്ടികയില്‍നിന്ന് ഒഴിവാക്കിയിട്ടുണ്ട്.

കേന്ദ്ര ഉപഭോക്തൃ ഭക്ഷ്യ-പൊതുവിതരണ സഹമന്ത്രി ദാന്‍വേ റാവു സാഹബ് ദാദറോ നേരത്തെ 2020 സെപ്റ്റംബര്‍ 14-ന് ലോക്‌സഭയില്‍ ബില്‍ അവതരിപ്പിച്ചിരുന്നു. 2020 ജൂണ്‍ 5-ന് പുറപ്പെടുവിച്ച ഓര്‍ഡിനന്‍സിനു പകരമായി അവതരിപ്പിച്ച ബില്‍ സെപ്റ്റംബര്‍ 15-ന് ലോക്‌സഭയില്‍ പാസായി.

അവശ്യസാധന (ഭേദഗതി) ബില്ലിലൂടെ സ്വകാര്യ നിക്ഷേപകര്‍ക്ക് അവരുടെ വ്യാപാര പ്രവര്‍ത്തനങ്ങളില്‍ അമിതമായ നിയന്ത്രണ ഇടപെടല്‍ ഉണ്ടാകുമെന്ന ഭീതി ഇല്ലാതാക്കാനാണ് ലക്ഷ്യമിടുന്നത്. ഉല്‍പ്പാദനം, സംഭരണം, കൈമാറ്റം, വിതരണം എന്നിവയ്ക്കുള്ള സ്വാതന്ത്ര്യം കാര്‍ഷിക മേഖലയിലേക്കു കൂടുതല്‍ സ്വകാര്യ നിക്ഷേപകരെയും നേരിട്ടുള്ള വിദേശ നിക്ഷേപവും ആകര്‍ഷിക്കും. ഉപഭോക്താക്കളുടെ താല്‍പര്യവും സംരക്ഷിക്കപ്പെടുന്നുണ്ടെന്നു സര്‍ക്കാര്‍ ഉറപ്പാക്കിയിട്ടുണ്ട്.

ഈ കാര്‍ഷിക ഭക്ഷ്യ ഉല്‍പന്നങ്ങളുടെ മേല്‍ യുദ്ധം, ക്ഷാമം, അസാധാരണ വിലക്കയറ്റം, പ്രകൃതിദുരന്തം തുടങ്ങിയ അവസരങ്ങളില്‍ നിയന്ത്രണം ഏര്‍പ്പെടുത്താവുന്നതാണെന്നും ഭേദഗതി വ്യവസ്ഥ ചെയ്യുന്നുണ്ട്. ആവശ്യത്തിനു സംഭരണ സംവിധാനം ഇല്ലാത്തതിനാല്‍ കാര്‍ഷികോല്‍പന്നങ്ങള്‍ പാഴായിപ്പോകുന്നതു തടയാനും കാര്‍ഷിക മേഖലയിലെ വിപണന ശൃംഖല ശക്തിപ്പെടുത്തുന്നതിനും ഈ ബില്‍ സഹായിക്കും.