ബെംഗളൂരു ലഹരിക്കേസും അന്വേഷിക്കാന് ദേശീയ അന്വേഷണ ഏജന്സിക്ക് അധികാരം നല്കി കേന്ദ്ര സര്ക്കാര് വിജ്ഞാപനം ഇറക്കി
ബെംഗളൂരു ലഹരിമരുന്ന് കേസിന് തിരുവനന്തപുരം വിമാനത്താവളം വഴിയുള്ള സ്വര്ണക്കടത്തുമായി ബന്ധം സംശയിക്കുന്ന സാഹചര്യത്തില് ആ കേസ് ഉള്പ്പെടെ അന്വേഷിക്കാന് ദേശീയ അന്വേഷണ ഏജന്സിക്ക് (എന്ഐഎ) അധികാരം നല്കി കേന്ദ്ര സര്ക്കാര് വിജ്ഞാപനമിറക്കി. നിലവില് എന്ഡിപിഎസിനു കീഴിലുള്ള കേസുകള് നര്കോട്ടിക് കണ്ട്രോള് ബ്യൂറോയാണ് അന്വേഷിക്കുന്നത്. രാജ്യദ്രോഹം, ഭീകരവാദം എന്നിവയടക്കം തങ്ങളുടെ അധികാരപരിധിയില് വരുന്ന കേസുകളുമായി ബന്ധപ്പെട്ട ലഹരിമരുന്ന് ഇടപാടുകളാണ് അന്വേഷിക്കുകയെന്നും കേരളത്തിലെ സ്വര്ണക്കടത്തുമായി ബന്ധം സംശയിക്കുന്ന ബെംഗളൂരുവിലെ ലഹരിമരുന്ന് ഇടപാട് അത്തരത്തിലുള്ളതാണെന്നും എന്ഐഎ വൃത്തങ്ങള് പറഞ്ഞു.
നര്കോട്ടിക് ഡ്രഗ്സ് ആന്ഡ് സൈക്കോട്രോപിക് സബ്സ്റ്റന്സസ് ആക്ടിന് (എന്ഡിപിഎസ്) കീഴില് വരുന്ന ലഹരിമരുന്ന് കേസുകള് എന്ഐഎ ഇന്സ്പെക്ടര് മുതല് മുകളില് റാങ്കുള്ള ഉദ്യോഗസ്ഥര്ക്ക് അന്വേഷിക്കാമെന്ന് വിജ്ഞാപനത്തില് കേന്ദ്രം ചൂണ്ടിക്കാട്ടി.
യുഎപിഎ ബാധകമാകുന്ന കേസുകളുമായി ബന്ധപ്പെട്ട ലഹരിമരുന്ന് ഇടപാടുകളാവും എന്ഐഎ അന്വേഷിക്കുക. ബോളിവുഡ് നടന് സുശാന്ത് സിങ് രാജ്പുത്തിന്റെ മരണവുമായി ബന്ധപ്പെട്ട ലഹരിമരുന്ന് ഇടപാടുകള് എന്ഐഎക്കു വിടണമെന്ന ആവശ്യവും ശക്തമാണ്. ഈ കേസില് യുഎപിഎ, ഭീകരവാദ ബന്ധങ്ങള് തെളിഞ്ഞിട്ടില്ല. ലഹരിമരുന്ന് കേസ് പ്രതി അനൂപ് മുഹമ്മദുമായുള്ള ബന്ധത്തിന്റെ പേരില് ബിനീഷ് കോടിയേരിയെ എന്ഫോഴ്സ്മെന്റ് ഡയറക്ടറേറ്റ് (ഇഡി) അടുത്തിടെ ചോദ്യം ചെയ്തിരുന്നു.
ലൈഫ് മിഷനിലെ റെഡ് ക്രസന്റ് സഹായം, യുഎഇ കോണ്സുലേറ്റിന്റെ നേതൃത്വത്തില് നടന്ന കിറ്റ്, മതഗ്രന്ഥ, ഈന്തപ്പഴ വിതരണം എന്നിവയുള്പ്പെടെയുള്ള കേസുകളുടെ പ്രാഥമിക റിപ്പോര്ട്ട് കൊച്ചിയിലെ സിബിഐ ആന്റി കറപ്ഷന് യൂണിറ്റ് ഡല്ഹിയില് സിബിഐ ആസ്ഥാനത്തിനു കൈമാറി. കേസന്വേഷിക്കുന്ന ഇഡി, എന്ഐഎ, കസ്റ്റംസ് എന്നിവരുടെ പക്കല്നിന്ന് ഇതുസംബന്ധിച്ച വിവരങ്ങള് നേരത്തേ സിബിഐ ശേഖരിച്ചിരുന്നു. ലൈഫ് മിഷന് പദ്ധതിയിലെ ഉള്പ്പെടെ എല്ലാ വിദേശ സഹായ നിയന്ത്രണ നിയമ (എഫ്സിആര്എ) ലംഘനങ്ങളും അന്വേഷിക്കാന് സിബിഐ വന്നേക്കും.
ഇതോടെ സ്വര്ണക്കടത്ത് കേസിന്റെ പിന്നാലെയെത്തുന്ന കേന്ദ്ര ഏജന്സികളുടെ എണ്ണം 5 ആകും. പ്രതികളുടെ ബെനാമി സ്വത്തിനെക്കുറിച്ച് ആദായ നികുതി വകുപ്പ് അന്വേഷിക്കുന്നുണ്ട്. അനില് അക്കര എംഎല്എ നല്കിയ പരാതിയും സിബിഐക്കു മുന്നിലുണ്ട്. ലൈഫ് മിഷനില് വടക്കാഞ്ചേരിയിലെ ഫ്ലാറ്റ് നിര്മാതാക്കളായ കമ്പനി 2019 മുതല് ജിഎസ്ടി അടയ്ക്കുന്നില്ലെന്നും ലൈഫ് മിഷനിലെ അഴിമതിയുമാണു പരാതിയിലുള്ളത്.
https://www.facebook.com/Malayalivartha
