കൃത്രിമ മാര്‍ഗങ്ങള്‍ പരമാവധി ഉപയോഗിച്ചാണ് കോവിഡ് ബാധിച്ച് ചികിത്സയിലുള്ള പിന്നണി ഗായകന്‍ എസ്.പി. ബാലസുബ്രഹ്മണ്യത്തിന്റെ ജീവന്‍ നിലനിര്‍ത്തുന്നതെന്ന് ചെന്നൈ എം.ജി.എം. ഹെല്‍ത്ത് കെയര്‍ ആശുപത്രി പുറത്തുവിട്ട മെഡിക്കല്‍ ബുള്ളറ്റിന്‍. 'എക്മോ' അടക്കമുള്ള ജീവന്‍ രക്ഷാ ഉപകരണങ്ങള്‍ അവലംബിച്ചിട്ടും ബാലസുബ്രഹ്മണ്യത്തിന്റെ ആരോഗ്യസ്ഥിതി വഷളാകുകയാണെന്ന് ആശുപത്രി അസിസ്റ്റന്റ് ഡയറക്ടര്‍ ഡോ. അനുരാധാ ഭാസ്‌കരന്‍ അറിയിച്ചു.

എസ്.പി.ബിയെ നേരിയ കോവിഡ് ലക്ഷണങ്ങളോടെ ഓഗസ്റ്റ് അഞ്ചിനാണ് ആശുപത്രിയില്‍ പ്രവേശിപ്പിച്ചത്. വൈറസ് ബാധിതനാണെന്നു സ്ഥിരീകരിച്ച വിവരം അതേദിവസം തന്നെ അദ്ദേഹം സാമൂഹിക മാധ്യമങ്ങളിലൂടെ പുറത്തുവിട്ട വീഡിയോയിലൂടെ ആരാധകരുമായി പങ്കുവയ്ക്കുകയും ചെയ്തു. എന്നാല്‍ ശ്വാസതടസം മൂര്‍ച്ഛിച്ച് ആരോഗ്യനില വഷളായതോടെ ഓഗസ്റ്റ് 13-ന് ഐ.സി.യുവിലേക്കു മാറ്റി. പ്ലാസ്മാ തെറാപ്പിക്ക് അടക്കം വിധേയനാക്കിയിട്ടും ദിവസങ്ങളോളം അതീവ ഗുരുതരാവസ്ഥയിലായിരുന്നു അദ്ദേഹം.

വിദേശ രാജ്യങ്ങളിലെ വിദഗ്ധ ഡോക്ടര്‍മാരുമായി കൂടിയാലോചിച്ചു നടത്തിയ ചികിത്സയിലൂടെ മെല്ലെ ആരോഗ്യനിലയില്‍ സ്ഥിരത കൈവരിച്ചെങ്കിലും ഗുരുതര നിലയില്‍നിന്നു കരകയറിയിരുന്നില്ല. ഒരുമാസത്തോളം നീണ്ട ചികിത്സയ്ക്കുശേഷം കഴിഞ്ഞ എട്ടിന് അദ്ദേഹം കോവിഡ് മുക്തനായി.

ഇക്കഴിഞ്ഞ 19-ാം തീയതി, വെന്റിലേറ്റര്‍ ഒഴിവാക്കിയിട്ടില്ലെങ്കിലും പിതാവിന്റെ ആരോഗ്യനിലയില്‍ പുരോഗതിയുണ്ടെന്ന് മകനും പിന്നണിഗായകനുമായ എസ്.പി. ചരണ്‍ അറിയിച്ചിരുന്നു. വായിലൂടെ ഭക്ഷണം കഴിച്ചുതുടങ്ങിയതു ശുഭസൂചനയാണെന്ന് ഡോക്ടര്‍മാര്‍ അറിയിച്ചെന്നും അദ്ദേഹം വ്യക്തമാക്കിയിരുന്നു. അതിനിടെ നില വീണ്ടും വഷളാകുകയായിരുന്നു.