പാര്‍ലമെന്റ് പാസാക്കിയ കര്‍ഷക ബില്ലുകള്‍ക്കെതിരായ പ്രക്ഷോഭം ഉത്തരേന്ത്യന്‍ സംസ്ഥാനങ്ങളെ സ്തംഭിപ്പിച്ചു
പാര്‍ലമെന്റ് പാസാക്കിയ കര്‍ഷക ബില്ലുകള്‍ക്കെതിരെ 150-ലധികം കര്‍ഷക സംഘടനകള്‍ സംയുക്തമായി ആഹ്വാനം ചെയ്ത പ്രതിഷേധം വിവിധ ഉത്തരേന്ത്യന്‍ സംസ്ഥാനങ്ങളെ സ്തംഭിപ്പിച്ചു. ഹരിയാനയിലും പഞ്ചാബിലും ശക്തമായ പ്രതിഷേധം അലയടിച്ചു.
കര്‍ഷക മാര്‍ച്ചുകള്‍ തടയുന്നതിന് ഡല്‍ഹി അതിര്‍ത്തികള്‍ കനത്ത പൊലീസ് കാവലിലാണ്. അഖിലേന്ത്യ കിസാന്‍ സംഘര്‍ഷ് കോര്‍ഡിനേഷന്‍ കമ്മിറ്റിയുടെ ആഹ്വാനപ്രകാരം ഉത്തര്‍പ്രദേശ്, ബിഹാര്‍, കര്‍ണാടക തുടങ്ങിയ സംസ്ഥാനങ്ങളിലും കര്‍ഷകര്‍ തെരുവിലിറങ്ങി. പഞ്ചാബില്‍ ട്രെയിന്‍ തടയല്‍ സമരം രണ്ടാം ദിവസത്തേക്ക് കടന്നു. അംബാലയിലെ ഹരിയാന-പഞ്ചാബ് അതിര്‍ത്തി അടച്ചു. വിവിധ ദേശീയപാതകള്‍ സമരക്കാര്‍ ഉപരോധിച്ചു.
സംഘര്‍ഷ സാധ്യത കണക്കിലെടുത്ത് അംബാലയിലെ പഞ്ചാബ്-ഹരിയാന അതിര്‍ത്തി അടച്ചു. ഡല്‍ഹി ഹരിയാന, ഡല്‍ഹി ഉത്തര്‍പ്രദേശ് അതിര്‍ത്തികളില്‍ കനത്ത ജാഗ്രതയിലാണ് പൊലീസ്. പ്രക്ഷോഭങ്ങളുടെ മുഖ്യകേന്ദ്രങ്ങള്‍ പഞ്ചാബും ഹരിയാനയും തന്നെയാണ്. അംബാലയിലും അമൃത്സറിലും കര്‍ഷകര്‍ റെയില്‍വേ ലൈനുകള്‍ രാവിലെ മുതല്‍ ഉപരോധിച്ചു.
ആര്‍ജെഡി നേതാവ് തേജസ്വി യാദവിന്റെ നേതൃത്വത്തില്‍ പട്‌നയില്‍ ട്രക്ക് റാലി നടന്നു. കര്‍ഷക പ്രക്ഷോഭത്തിന് പിന്തുണ പ്രഖ്യാപിച്ച് ഇടത് സംഘടനകള്‍ ഡല്‍ഹി ജന്ദര്‍ മന്തറില്‍ ധര്‍ണ നടത്തി. ഡല്‍ഹി അമൃത്സര്‍, ഡല്‍ഹി മീററ്റ്, ഡല്‍ഹി നോയിഡ, അയോധ്യ ലക്‌നൗ, ഫരീദ്‌കോട്ട് കോട്കപുര തുടങ്ങിയ ദേശീയപാതകള്‍ സമരക്കാര്‍ ഉപരോധിച്ചു. കോണ്‍ഗ്രസും ഇടതുപക്ഷവും ഉള്‍പ്പെടെ 18 പ്രതിപക്ഷ പാര്‍ട്ടികളാണ് പ്രതിഷേധങ്ങള്‍ക്ക് പിന്തുണ പ്രഖ്യാപിച്ചിട്ടുള്ളത്.
https://www.facebook.com/Malayalivartha
