മമതയെ കെട്ടിപ്പിടിക്കുമോ... ബി.ജെ.പി നേതാവിന് കോവിഡ് സ്ഥിരീകരിച്ചു, തനിക്ക് കോവിഡ് ബാധിച്ചാല് മമതയെ കെട്ടിപ്പിടിക്കുമെന്ന് ഭീഷണി ഉയര്ത്തിയിരുന്നു!
ബി.ജെ.പി ദേശീയ സെക്രട്ടറിയായി ഈയിടെ നിയമിതനായ അനുപം ഹസാരെയ്ക്ക് കോവിഡ് സ്ഥിരീകരിച്ചു. അദ്ദേഹത്തെ കൊല്ക്കത്തയിലെ സ്വകാര്യ ആശുപത്രിയിയില് പ്രവേശിപ്പിച്ചു. ശാരീരികാസ്വാസ്ഥ്യം അനുഭവപ്പെട്ടതിനെ തുടര്ന്ന് അനുപത്തെ കോവിഡ് പരിശോധനയ്ക്ക് വിധേയനാക്കുകയായിരുന്നു.
പശ്ചിമ ബംഗാള് മുഖ്യമന്ത്രി മമതാ ബാനര്ജിക്ക് കോവിഡ് പരത്തുമെന്ന് ഭീഷണിപ്പെടുത്തിയിരുന്നു. തനിക്ക് കോവിഡ് ബാധിച്ചാല് മുഖ്യമന്ത്രി മമതാ ബാനര്ജിയെ കെട്ടിപ്പിടിക്കുമെന്നായിരുന്നു അനുപമിന്റെ വിവാദ പ്രസ്താവന. ഇയാളുടെ പ്രസ്താവനയ്ക്കെതിരെ സിലിഗുരി പോലീസില് തൃണമുല് കോണ്ഗ്രസ് നല്കിയ പരാതിയില് കേസെടുത്തിട്ടുണ്ട്.
ഇക്കഴിഞ്ഞ ഞായറാഴ്ചയായിരുന്നു ബരുയിപൂരില് വച്ച് അനുപം വിവാദ പ്രസ്താവന നടത്തിയത്. ശനിയാഴ്ചയാണ് മുതിര്ന്ന നേതാവ് രാഹുല് സിന്ഹയെ ഒഴിവാക്കി തൃണമുല് കോണ്ഗ്രസില് നിന്ന് എത്തിയ ഹസാരെയെ ബി.ജെ.പി ദേശീയ പദവിയിലേക്ക് ഉയര്ത്തിയത്.
പാര്ട്ടി പ്രവര്ത്തകരെ കൂട്ടി കോവിഡ് മാനദണ്ഡങ്ങള് ലംഘിച്ച് പരിപാടി സംഘടിപ്പിച്ചതിനെക്കുറിച്ച് ചോദിച്ചപ്പോഴായിരുന്നു വിവാദ പ്രസ്താവന. കോവിഡിനേക്കാള് വലിയ ശത്രുവായ മമതാ ബാനര്ജിക്കെതിരായ പോരാട്ടത്തിലാണ് ബി.ജെ.പിയെന്നും അതുകൊണ്ടു തന്നെ പാര്ട്ടി പ്രവര്ത്തകര്ക്ക് കോവിഡിനെ ഭയമില്ലെന്നും അനുപം പറഞ്ഞു. കൂടാതെ തനിക്ക് കോവിഡ് ബാധിച്ചാല് മമതാ ബാനര്ജിയെ കെട്ടിപ്പിടിക്കുമെന്നും അനുപം പറഞ്ഞു.
https://www.facebook.com/Malayalivartha
