രൂപേഷിനെയും സംഘത്തെയും ക്യൂബ്രാഞ്ച് കസ്റ്റഡിയില് വിട്ടു
സി.പി.ഐ(മാവോയിസ്റ്റ്) ദക്ഷിണേന്ത്യന് കമാന്ഡര് രൂപേഷിനേയും പിടിയിലായ മറ്റ് അഞ്ചുപേരെയും കോടതി പത്തുദിവസത്തേക്കു തമിഴ്നാട് ക്യൂബ്രാഞ്ചിന്റെ കസ്റ്റഡിയില് വിട്ടു. പ്രതികള് ദേശവിരുദ്ധ പ്രവര്ത്തനം നടത്തിയെന്നും മാവോയിസ്റ്റുകള് ഒളിപ്പിച്ചുവച്ച ആയുധങ്ങള് കണ്ടെടുക്കാനുണ്ടെന്നും അതിനാല് 15 ദിവസത്തേക്കു കസ്റ്റഡിയില് നല്കണമെന്നും ആവശ്യപ്പെട്ട് ക്യൂബ്രാഞ്ച് കോടതിയില് അപേക്ഷ സമര്പ്പിച്ചിരുന്നു. അപേക്ഷ പരിഗണിച്ച കോയമ്പത്തൂര് രണ്ടാം ജുഡീഷ്യല് മജിസ്ട്രേറ്റ് കോടതി ജഡ്ജി എം.പി. സുബ്രഹ്മണ്യം പ്രതികളെ പത്തുദിവസത്തേക്കു കസ്റ്റഡിയില് വിടുകയായിരുന്നു. ഇന്നലെ വൈകീട്ടാണു രൂപേഷിനെയും സംഘത്തെയും കോടതിയില് ഹാജരാക്കിയത്.
രൂപേഷിന്റെയും ഷൈനയുടേയും മക്കളായ ആമിയും സവേരയും കോടതിയിലെത്തി ഇരുവരേയും കണ്ടു. രൂപേഷിന്റെ സഹോദരന്മാരായ രാജേഷിനും സുമേഷിനുമൊപ്പം കോടതിയിലെത്തിയ ഇവര് കോടതിയുടെ അനുമതിയോടെയാണു മാതാപിതാക്കളെ കണ്ടത്. ഇന്നലെ രാവിലെ കോയമ്പത്തൂര് സെന്ട്രല് ജയിലിലെത്തിയ ഇവര്ക്ക് കൂടിക്കാഴ്ചയ്ക്ക് അനുവാദം നല്കിയിരുന്നില്ല.
ഇന്നലെ കോടതിയിലേക്കു കൊണ്ടുവന്നപ്പോഴും സംഘത്തിലുള്ളവര് മാവോയിസ്റ്റ് അനുകൂല മുദ്രാവാക്യം വിളിച്ചു. ആന്ധ്രയില്നിന്നു പോലീസ് തട്ടിക്കൊണ്ടുവരികയായിരുന്നുവെന്ന് അനൂപും കണ്ണനും ആവര്ത്തിച്ചു. ജയിലില് ശാരീരിക ഉപദ്രവമുണ്ടായില്ലെന്നും ഇവര് പറഞ്ഞു. രൂപേഷ്, ഭാര്യ ഷൈന, പത്തനംതിട്ട സ്വദേശി അനൂപ് മാത്യു, മധുര സ്വദേശി കണ്ണന്, കടലൂര് സ്വദേശി ഈശ്വര് എന്നിവരെയാണു തിങ്കളാഴ്ച കോയമ്പത്തൂര് കരുമത്തംപട്ടിയിലെ ബേക്കറിയില്നിന്നു പോലീസ് പിടികൂടിയത്. കുറ്റകരമായ ഗൂഢാലോചന, നിയമവിരുദ്ധ പ്രവര്ത്തന നിരോധന നിയമത്തിലെ (യു.എ.പി.എ) 20ാം വകുപ്പ് എന്നിവ ചുമത്തിയതിനാല് ഇവരെ ജൂണ് മൂന്നുവരെ റിമാന്ഡ് ചെയ്തിരിക്കയാണ്.
കേരളത്തില്നിന്നും ആഭ്യന്തര സുരക്ഷാവിഭാഗം എസ്.പി: എ. അനില്കുമാര് ഇന്നലെ കോയമ്പത്തൂരിലെത്തിയിരുന്നു. പ്രതികളെ തമിഴ്നാട് പോലീസ് കസ്റ്റഡിയില് വിട്ട സാഹചര്യത്തില് ഇനി കോടതിയില് ഹാജരാക്കിയശേഷമേ മറ്റു സംസ്ഥാനങ്ങളിലെ കേസുകളില് അന്വേഷണത്തിനു വിട്ടുകിട്ടുകയുള്ളു. കേരളത്തിനു പുറമെ ആന്ധ്ര, കര്ണാടക പോലീസും ഇവരെ കസ്റ്റഡിയില് വാങ്ങാനുള്ള നടപടി ആരംഭിച്ചിട്ടുണ്ട്. മാവോയിസ്റ്റ് സംഘത്തിലെ മറ്റൊരു പ്രധാനി കാളിദാസിനു വേണ്ടി ഇന്നലെ തമിഴ്നാട്ടിലെ ധര്മപുരി, കൃഷ്ണഗിരി ജില്ലകളില് തെരച്ചില് തുടര്ന്നു. സംസ്ഥാന അതിര്ത്തിയിലെ പോലീസ് സ്റ്റേഷനുകള്ക്കു തമിഴ്നാട് പോലീസ് ജാഗ്രതാ നിര്ദേശം നല്കിയിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
