വീണ്ടും പൊതു പരിപാടിക്കിടെ കര്‍ഷകന്റെ ആത്മഹത്യാ ശ്രമം. ആന്ധ്രാപ്രദേശ് മുഖ്യമന്ത്രി എന്‍.ചന്ദ്രബാബു നായിഡുവിന്റെ പൊതുപരിപാടിക്കിടെയാണ് കര്‍ഷകര്‍ ആത്മഹത്യയ്ക്ക് ശ്രമിച്ചത്. പ്രവാതിപുരം മണ്ഡലിലെ നര്‍സിപുരത്ത് ബുധനാഴ്ചയാണ് സംഭവം. ഇതേതുര്‍ന്ന് പ്രദേശത്ത് ഏറെ നേരം സംഘര്‍ഷാവസ്ഥയും നിലനിന്നിരുന്നു.
പൊതുപരിപാടിയില്‍ ചന്ദ്രബാബു നായിഡു പ്രസംഗിച്ചുകൊണ്ടിരിക്കേ സമീപ പ്രദേശമായ ചിന്‍ഭോിയില്‍ നിന്നുള്ള രാമു എന്നയാള്‍ വിഷവുമായി സ്ഥലത്തെത്തുകയായിരുന്നു. വില്ലേജ് ഡവലപ്‌മെന്റ് ഓഫീസര്‍ തന്നെ തുടര്‍ച്ചയായി അപമാനിക്കുകയാണെന്ന് ആരോപിച്ച് ഇയാള്‍ വിഷം കഴിച്ചു. ഇതോടെ നായിഡു പ്രസംഗം നിര്‍ത്തി. രാമുവിനെ ആശുപത്രിയിലേക്ക് മാറ്റി. ഇയാളുടെ നില ഗുരുതരമായി തുടരുകയാണ്.
കഴിഞ്ഞ മാസം ആം ആദ്മി പാര്‍ട്ടി ഡല്‍ഹിയില്‍ ജന്തര്‍ മന്തറില്‍ നടത്തിയ കര്‍ഷക പ്രതിഷേധ റാലിക്കിടെ രാജസ്ഥാനില്‍ നിന്നുള്ള ഒരു കര്‍ഷകന്‍ ആത്മഹത്യ ചെയ്തത് വലിയ കോളിളക്കം സൃഷ്ടിച്ചിരുന്നു. മുഖ്യമന്ത്രി അരവിന്ദ് കെജ്‌രിവാള്‍ സംസാരിക്കുന്നതിനിടെയാണ് കര്‍ഷകന്‍ മരത്തില്‍ കയറി തൂങ്ങിയത്. കര്‍ഷകനെ ആശുപത്രിയിലേക്കു മാറ്റിയിട്ടും കെജ്‌രിവാള്‍ പ്രസംഗം തുടര്‍ന്നത് വിവാദമായിരുന്നു. ഇതില്‍ കെജ്‌രിവാള്‍ പിന്നീട് ഖേദം പ്രകടിപ്പിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha