പുലിയുടെ ആക്രമണത്തില് നിന്നും പതിനഞ്ചുകാരി രക്ഷപ്പെട്ടത് 50 കാരിയുടെ മനോധൈര്യം കൊണ്ട്
പതിനഞ്ചുകാരി പെണ്കുട്ടിയെ പുള്ളിപ്പുലിയുടെ ആക്രമണത്തില് നിന്ന് രക്ഷപ്പെടുത്തിയത് 50 കാരിയായ ബന്ധു. ഉത്തരാഖണ്ഡിലെ പൗരി ഗര്വാളിലെ മന്ദാഖല് ഗ്രാമവാസിയായ പിത്താംബരി ദേവിയാണ് പെണ്കുട്ടിയുടെ രക്ഷകയായി മാറിയത്. കന്നുകാലികളെ മേയ്ക്കാന് ഗ്രാമത്തിന് സമീപത്തുള്ള വനാതിര്ത്തിയിലെത്തി മടങ്ങവെയാണ് പിത്താംബരി ദേവിയ്ക്കും ബന്ധുവായ പെണ്കുട്ടിക്കുമെതിരെ പുലി ചാടിവീണത്. 'ഉച്ചയോടെ, ഞാനും ബന്ധുവായ പെണ്കുട്ടിയും വീട്ടിലേക്കുള്ള യാത്രാമധ്യേ അപരിചിതമായ ഒരു ശബ്ദം കേട്ടു. ഞാന് തിരിഞ്ഞുനോക്കിയപ്പോള്, ഒരു പെണ്കുട്ടിയുടെ കഴുത്തില് പിടിച്ച് കാട്ടിലേക്ക് വലിച്ചിഴയ്ക്കാന് ശ്രമിക്കുന്നതാണ് കണ്ടത്. പെട്ടെന്ന് ഞാന് എന്തു ചെയ്യണമെന്ന് അറിയാതെ സ്തംഭിച്ചുപോയി.
'പുള്ളിപ്പുലിയെ എങ്ങനെ മറികടക്കുമെന്ന് എനിക്കറിയില്ലായിരുന്നു, പക്ഷേ എന്റെ കൈയില് ഒരു വടി കിട്ടി. അതുമായി ഞാന് അലറിക്കൊണ്ട് പുള്ളിപ്പുലിയുടെ അടുത്തേക്ക് ഓടി, 'അവര് പറഞ്ഞു. 'എന്നാല് എന്റെ നിലവിളി ആ പുലിയെ ഭയപ്പെടുത്തിയില്ല. എന്നാല് എന്തും വരട്ടെയെന്ന് കരുതി ഞാന് അലറിക്കൊണ്ട് പുലിയെ കുറേ തവണ വടികൊണ്ട് അടിച്ചു. ഇതോടെയാണ് പുള്ളിപ്പുലി പെണ്കുട്ടിയെ ഉപേക്ഷിച്ചു വനത്തിലേക്ക് ഓടി മറഞ്ഞത്,' അവര് കൂട്ടിച്ചേര്ത്തു. പുലിയുടെ ആക്രമണത്തില് കഴുത്തില് ആഴത്തില് മുറിവേറ്റ പെണ്കുട്ടിയെ ശ്രീനഗര് മെഡിക്കല് കോളേജില് പ്രവേശിപ്പിച്ചു.
https://www.facebook.com/Malayalivartha