സയിദ് സലാഹുദീന് ഉള്പ്പെടെ 18 പേരെ കേന്ദ്ര ആഭ്യന്തര മന്ത്രാലയം ഭീകരരായി പ്രഖ്യാപിച്ചു
ഹിസ്ബുല് മുജാഹിദീന് മേധാവി സയിദ് സലാഹുദീന് ഉള്പ്പെടെ 18 പേരെ, നിയമവിരുദ്ധ പ്രവര്ത്തന നിരോധന നിയമത്തിലുള്പ്പെടുത്തി (യുഎപിഎ) കേന്ദ്ര ആഭ്യന്തര മന്ത്രാലയം ഭീകരരായി പ്രഖ്യാപിച്ചു. അധോലോക നായകന് ദാവൂദ് ഇബ്രാഹിം അടക്കം 13 പേരെ ഉള്പ്പെടുത്തി മുന്പു തയാറാക്കിയ ഭീകരരുടെ പട്ടികയിലേക്ക് ഇവരെക്കൂടി ചേര്ത്തു. വ്യക്തികളെ ഭീകരരായി പ്രഖ്യാപിക്കാനുള്ള വ്യവസ്ഥയുള്പ്പെടുത്തി 2019 ഓഗസ്റ്റിലാണ് കേന്ദ്ര സര്ക്കാര് നിയമം ഭേദഗതി ചെയ്തത്.
ഭീകര സംഘടനയായ ഹിസ്ബുല് മുജാഹിദീന്റെ പ്രവര്ത്തനങ്ങള്ക്കു നേതൃത്വം നല്കുന്നവരായ സയിദ് സലാഹുദീന്, ഗുലാം നബി ഖാന്, 1999 -ല് ഇന്ത്യന് എയര്ലൈന്സ് വിമാനം അഫ്ഗാനിസ്ഥാനിലെ കാണ്ഡഹാറിലേക്കു തട്ടിക്കൊണ്ടു പോയ ഭീകരരായ അബ്ദുല് റവൂഫ് അസ്ഗര്, ഇബ്രാഹിം അത്തര്, യൂസഫ് അസ്ഹര്, (ഭീകര സംഘടനയായ ജയ്ഷെ മുഹമ്മദ് മേധാവി മസൂദ് അസ്ഹറിന്റെ ബന്ധുക്കള്. 2001 ലെ പാര്ലമെന്റ് ആക്രമണ കേസിലും അസ്ഗര് പ്രതിയാണ്), ഇന്ത്യന് മുജാഹിദീന് സ്ഥാപകരും ഡല്ഹി, മുംബൈ, ബെംഗളൂരു, പുണെ, ജയ്പുര്, അഹമ്മദാബാദ്, സൂറത്ത് എന്നിവിടങ്ങളിലെ ഭീകരാക്രമണങ്ങളില് പ്രതികളുമായ റിയാസ് ഭട്കല്, ഇഖ്ബാല് ഭട്കല്, ദാവൂദ് ഇബ്രാഹിമിന്റെ അടുത്ത അനുയായികളും ദാവൂദിന്റെ കീഴിലുള്ള ഡി കമ്പനിയുടെ പ്രവര്ത്തനങ്ങള് നിയന്ത്രിക്കുന്നവരുമായ ഛോട്ടാ ഷക്കീല്, മുഹമ്മദ് അനീസ് ഷെയ്ഖ്, ടൈഗര് മേമന്, ജാവേദ് ചിക്ന, ലഷ്കറെ തയിബ ഭീകരരായ സാജിദ് മിര്, യൂസഫ് മുസമ്മില്, അബ്ദുര് റഹ്മാന് മഖി (2008 ലെ മുംബൈ ഭീകരാക്രമണത്തിന്റെ അണിയറയില് പ്രവര്ത്തിച്ചവര്. ലഷ്കര് മേധാവി ഹാഫിസ് സയീദിന്റെ ഭാര്യാ സഹോദരനാണു മഖി), ഗുജറാത്ത് അക്ഷര്ധാം ക്ഷേത്രത്തിലെ ഭീകരാക്രമണം (2002), ഹൈദരാബാദിലെ ചാവേറാക്രമണം (2005) എന്നിവയില് പ്രതിയായ പാക്ക് ഭീകരന് അബു സൂഫിയന്, ലഷ്കറിന്റെ കീഴില് പാക്കിസ്ഥാനിലുള്ള സംഘടനയായ ഫലാഹി ഇന്സാനിയത് ഫൗണ്ടേഷന് ഉപമേധാവി ഷാഹിദ് മെഹമൂദ്, ജയ്ഷെ മുഹമ്മദ് കമാന്ഡറായ ഷാഹിദ് ലത്തീഫ് , ഹിസ്ബുല് മുജാഹിദീന്റെ സാമ്പത്തിക വിഭാഗം മേധാവിയായ സഫര് ഹുസൈന് ഭട്ട് എന്നിവരാണ് പുതിയതായി പേരു ചേര്ക്കപ്പെട്ടവര്.
https://www.facebook.com/Malayalivartha
