വിവാഹ വാഗ്ദാനം നല്‍കിയ പീഡിപിച്ചു എന്ന പരാതി നല്‍കിയതിന് പിന്നാലെ ഉത്തര്‍പ്രദേശില്‍ 26 കാരി വിഷം കഴിച്ച്‌ ആത്മഹത്യ ചെയ്തു. തിങ്കളാഴ്ച്ചയാണ് യുവാവിന്റെ വീടിന് മുന്നിലെത്തിയ യുവതി വിഷം കഴിച്ചത്. ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. വിവാഹ വാഗ്ദാനം നല്‍കി യുവാവ് പീഡിപിച്ചുവെന്നും എന്നാല്‍ പിന്നീട് പിന്മാറിയെന്നുമാണ് യുവതി നേരത്തെ പോലിസിന് നൽകിയിരുന്ന പരാതി. യുവാവ് മറ്റൊരു സ്ത്രീയെ വിവാഹം കഴിക്കാന്‍ തീരുമാനിച്ചതോടെയാണ് യുവതി ആത്മഹത്യ ചെയ്തത്.

കാമുകന്റെ വിവാഹത്തലേന്ന് യുവതി വീട്ടില്‍ എത്തി വിഷം കഴിക്കുകയായിരുന്നു. 27 വയസ്സുള്ള യുവാവിനെതിരെ യുവതി പരാതി നല്‍കിയിരുന്നു. ഏഴ് മാസമായി ഇയാളുമായി പ്രണയത്തിലായിരുന്നുവെന്നും പരാതിയില്‍ പറയുന്നുണ്ട്. നവംബര്‍ 20നാണ് യുവതി പൊലീസില്‍ പരാതി നല്‍കിയത്. പരാതി നല്‍കിയതിന് പിന്നാലെയാണ് യുവാവിന്റെ വിവാഹം 24 ന് തീരുമാനിച്ചിരിക്കുന്നതായി അറിഞ്ഞത്. ഇതോടെ ഇയാളുടെ വീട്ടില്‍ എത്തുകയായിരുന്നു.യുവാവുമായി വാക്കുതര്‍ക്കമാകുകയും ഒടുവില്‍ വീടിന് പുറത്തു വെച്ച്‌ പെണ്‍കുട്ടി കയ്യില്‍ കരുതിയ വിഷം കഴിക്കുകയായിരുന്നു.

സംഭവത്തില്‍ യുവാവിനെതിരെ ബലാത്സംഗം അടക്കമുള്ള വകുപ്പുകള്‍ ചുമത്തി പൊലീസ് അറസ്റ്റ് ചെയ്തു. അന്വേഷണം പുരോഗമിക്കുകയാണ്. പെണ്‍കുട്ടി നല്‍കിയ പരാതിയില്‍ പൊലീസ് മെഡിക്കല്‍ പരിശോധന നടത്തുകയും മജിസ്ട്രേറ്റിന് മുന്നില്‍ മൊഴി നല്‍കുകയും ചെയ്തിട്ടുണ്ട്.