അനധികൃത സ്വത്തുസമ്പാദന കേസില്‍ ശിക്ഷിക്കപ്പെട്ടതിനെ തുടര്‍ന്ന് എട്ടുമാസം മുന്‍പു നഷ്ടമായ തമിഴ്‌നാട് മുഖ്യമന്ത്രിപദവിയിലേക്കു ജയലളിത ഇന്നു തിരിച്ചെത്തുന്നു. രാവിലെ 11നു മദ്രാസ് സര്‍വകലാശാലാ ശതാബ്ദി ഓഡിറ്റോറിയത്തിലാണു സത്യപ്രതിജ്ഞ. ഇന്നലെ രാവിലെ ഏഴിനു ചേര്‍ന്ന അണ്ണാ ഡിഎംകെ നിയമസഭാകക്ഷി യോഗത്തിലാണു നിലവിലുള്ള മുഖ്യമന്ത്രി ഒ. പനീര്‍സെല്‍വം രാജി പ്രഖ്യാപിച്ചത്. പുതിയ നിയമസഭാകക്ഷി നേതാവായി ജയയെ തിരഞ്ഞെടുക്കുന്നതിനുള്ള പ്രമേയവും പനീര്‍സെല്‍വം അവതരിപ്പിച്ചു. നിലവില്‍ എംഎല്‍എ അല്ലാത്ത ജയ യോഗത്തില്‍ പങ്കെടുത്തില്ല.
ഇതിനു പിന്നാലെ പനീര്‍സെല്‍വം ഗവര്‍ണര്‍ കെ. റോസയ്യയ്ക്കു രാജിക്കത്തും ജയലളിതയെ പുതിയ നിയമസഭകക്ഷി നേതാവായി തിരഞ്ഞെടുത്തുകൊണ്ടുള്ള കത്തും കൈമാറി. റോസയ്യ ഉടന്‍ ജയയെ ഔദ്യോഗികമായി ക്ഷണിക്കുകയും ചെയ്തു. പുറത്തിറങ്ങാതെ പോയസ് ഗാര്‍ഡനിലെ വീട്ടില്‍ ചെലവഴിച്ച 217 ദിവസങ്ങള്‍ക്കു ശേഷം ജനമധ്യത്തിലേക്കുള്ള ജയയുടെ രംഗപ്രവേശമായിരുന്നു പിന്നീട്. ജ്യോതിഷവിധി പ്രകാരം ഉച്ചയ്ക്ക് 1.28നു പുറത്തിറങ്ങിയ ജയ രാജ്ഭവനിലെത്തി ഗവര്‍ണര്‍ക്ക് 29 മന്ത്രിമാരുടെ പട്ടിക കൈമാറി. മന്ത്രിമാരായ സെന്തൂര്‍ പാണ്ഡ്യന്‍, എം.എസ്.എം. ആനന്ദന്‍ എന്നിവരെ ഒഴിവാക്കി.

അഞ്ചാം തവണയാണു ജയലളിത മുഖ്യമന്ത്രിയാകുന്നത്. ഇതോടെ, ഇക്കാര്യത്തില്‍ കരുണാനിധിയുടെ റെക്കോര്‍ഡിനൊപ്പമെത്തുകയും ചെയ്യുന്നു. സത്യപ്രതിജ്ഞാ ചടങ്ങില്‍ കേന്ദ്ര സര്‍ക്കാരിനെ പ്രതിനിധീകരിച്ചു മന്ത്രിമാരായ അരുണ്‍ ജയ്റ്റ്‌ലി, സുഷമ സ്വരാജ്, രവിശങ്കര്‍ പ്രസാദ് എന്നിവര്‍ പങ്കെടുത്തേക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha