സ്വവര്‍ഗാനുരാഗിയായ യുവാവിന് ജീവിത പങ്കാളിയെ തേടിക്കൊണ്ടുള്ള ഇന്ത്യയിലെ ആദ്യത്തെ മാട്രിമോണിയല്‍ പരസ്യത്തിന് മികച്ച പ്രതികരണമാണ് ലഭിച്ചത്. മകനു വരനെ തേടി പത്രത്തില്‍ വിവാഹം പരസ്യം നല്‍കിയപ്പോള്‍ അമ്മ പോലും ഇത്രയും പ്രതീക്ഷിച്ചിരിക്കില്ല. രണ്ടു ദിവസത്തിനുള്ളില്‍ ഇവര്‍ക്ക് ലഭിച്ചത് 70 മറുപടികള്‍.
ഇന്ത്യന്‍ ദിനപ്പത്രങ്ങളില്‍ അത്യപൂര്‍വമായ പരസ്യത്തിന് രണ്ട് ദിവസം കൊണ്ട് എഴുപത് മറുപടികള്‍ ലഭിച്ചു. മുംബൈ സ്വദേശിയായ ഹരീഷ് അയ്യര്‍ക്ക് വേണ്ടിയാണ് മാതാവ് സ്വവര്‍ഗാനുരാഗിയായ വരനെ തേടി പരസ്യം ചെയ്തത്. അമേരിക്ക, സൗദി, യു.കെ എന്നിവടങ്ങളില്‍ നിന്നാണ് പരസ്യത്തിന് മറുപടി ലഭിച്ചത്. ഇതില്‍ നിന്ന് അനുയോജ്യനായ വരനെ ഉടന്‍ കണ്ടെത്തുമെന്നും അവര്‍ കൂട്ടിച്ചേര്‍ത്തു. മിക്കവരും മറുപടിക്കൊപ്പം ഫോട്ടൊയും അയച്ചിട്ടുണ്ടെന്ന് പത്മയും അറിയിച്ചു.
തനിക്കു ശേഷം മകന് കൂട്ടാകുന്ന അനുയോജ്യനായ ഒരു ജീവിതപങ്കാളിയെയാണ് തേടുന്നതെന്ന് പത്മ അയ്യര്‍ വ്യക്തമാക്കി. മുന്‍പ് ഇത്തരം ചിന്താഗതിയുള്ളവരുമായിച്ചേര്‍ന്ന് സ്വവര്‍ഗരതിക്കാര്‍ക്കു വേണ്ടി മാട്രിമോണിയല്‍ ഫോറം ആരംഭിക്കാന്‍ ഇവര്‍ ശ്രമിച്ചെങ്കിലും പദ്ധതി നടന്നിരുന്നില്ല. പരസ്യത്തിലൂടെ അനുയോജ്യനായ പങ്കാളിയെ കണ്ടെത്തിയാല്‍ വിവിധ മതാചാരങ്ങള്‍ സംയോജിപ്പിച്ച് വിവാഹം നടത്തണമെന്നാണ് ഇരുവരുടേയും ആഗ്രഹം.
സ്വവര്‍ഗ വിവാഹം നിയമവിരുദ്ധമായ ഇന്ത്യയില്‍ ഒട്ടേറെ വെല്ലുവിളികളെ അതിജീവിച്ചാണ് ഹരീഷ് അയ്യര്‍ വിവാഹ പരസ്യം നല്‍കിയത്. ടൈംസ് ഓഫ് ഇന്ത്യ അടക്കമുള്ള പ്രമുഖ ദേശീയ ദിനപ്പത്രങ്ങളെല്ലാം പരസ്യം പ്രസിദ്ധീകരിക്കാന്‍ വിസമ്മതിച്ചു. ഒടുവില്‍ \'മിഡ് ഡേ\' പത്രമാണ് പരസ്യം പ്രസിദ്ധീകരിക്കാന്‍ സമ്മതിച്ചത്. പരസ്യം നല്‍കാതിരുന്ന പത്രങ്ങള്‍ക്കെതിരെ ലൈംഗിക ന്യൂനപക്ഷങ്ങളുടെ സംഘടന രംഗത്തു വന്നിരുന്നു.
ഇരുപത്തഞ്ചിനും നാല്‍പ്പതിനും ഇടയ്ക്ക് പ്രായമുള്ള സസ്യാഹാരിയായ യുവാക്കളില്‍ നിന്ന് ആലോചന ക്ഷണിക്കുന്നു എന്നായിരുന്നു പരസ്യം. മതം പ്രശ്‌നമല്ലെങ്കിലും അയ്യര്‍ വിഭാഗത്തില്‍ നിന്നുള്ളവര്‍ക്ക് മുന്‍ഗണന നല്‍കുമെന്നും പരസ്യത്തില്‍ വ്യക്തമാക്കിയിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha