ആന്ധ്രയിലും തെലുങ്കാനയിലും കനത്ത ചൂടിനേയും ഉഷ്ണക്കാറ്റിനേയും തുടര്‍ന്നു മരിച്ചവരുടെ എണ്ണം 470 ആയി. ഞായറാഴ്ച വരെ ആന്ധ്രയില്‍ 290 പേരും തെലുങ്കാനയില്‍ 180 പേരുമാണ് മരിച്ചത്. ഞായറാഴ്ച വൈകുന്നേരം വരെ ലഭിച്ച കണക്കുകളാണ് ഇവ. രണ്ട് ദിവസം കൂടി ഉഷ്ണക്കാറ്റ് തുടരുമെന്നാണു കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്.

അലഹബാദിലാണു ഞായറാഴ്ച ഏറ്റവും കൂടുതല്‍ താപനില രേഖപ്പെടുത്തിയത്. 47.7 ഡിഗ്രി സെല്‍ഷ്യസാണ് ഇവിടെ രേഖപ്പെടുത്തിയത്. ഡല്‍ഹിയില്‍ 45 ഡിഗ്രി സെല്‍ഷ്യസ് വരെയാണ് അന്തരീക്ഷ താപനില ഉയര്‍ന്നത്. രാജസ്ഥാന്‍, മഹാരാഷ്ട്ര, മധ്യപ്രദേശ്, ഒഡീഷ, പശ്ചിമ ബംഗാള്‍ തുടങ്ങിയ സംസ്ഥാനങ്ങളിലും ചൂട് ഉയര്‍ന്നുതന്നെ നില്‍ക്കുകയാണ്.
ആന്ധ്രാതീരത്തിന് പുറമേ, ഡല്‍ഹി, ഹരിയാണ, ബിഹാര്‍, ജാര്‍ഖണ്ഡ്, മഹാരാഷ്ട്ര, ബംഗാള്‍, ഒഡിഷ തുടങ്ങി രാജ്യത്തിന്റെ മിക്കഭാഗങ്ങളിലും കനത്ത ചൂടാണ് അനുഭവപ്പെടുന്നത്. സമുദ്രനിരപ്പില്‍ നിന്ന് 6,580 അടി ഉയരത്തിലുള്ള ഉത്തരാഖണ്ഡിലെ മസൂറിയില്‍വരെ താപനില കുത്തനെ ഉയര്‍ന്നു. സാധാരണ തണുത്ത കാലാവസ്ഥയുള്ള ഇവിടെ ശനിയാഴ്ച താപനില 36 ഡിഗ്രി സെല്‍ഷ്യസ് കടന്നു.
ഡല്‍ഹിയില്‍ ഈ സീസണിലെ ഏറ്റവും ഉയര്‍ന്ന താപനിലയായ 44.5 ഡിഗ്രി സെല്‍ഷ്യസിലെത്തി. ആന്ധ്രയിലും തെലങ്കാനയിലുമൊഴികെ മറ്റ് സംസ്ഥാനങ്ങളില്‍ അത്യുഷ്ണം ദിവസങ്ങള്‍ നീണ്ടേക്കുമെന്നും മുന്നറിയിപ്പുണ്ട്. രാജ്യത്ത് കടുത്ത വരള്‍ച്ചയ്ക്കും കൃഷിനാശത്തിനും ഇതിടയാക്കുമെന്നും ആശങ്കയുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha