നരേന്ദ്ര മോഡിയെ വിമര്‍ശിച്ച് നടക്കുന്ന രാഹുല്‍ ഗാന്ധിക്ക് പിടിപ്പത് പണി നല്‍കി സ്മൃതി ഇറാനി. നരേന്ദ്ര മോദി സര്‍ക്കാരിന്റെ ഒന്നാം വാര്‍ഷിക ദിനമായ മെയ് 26നാണ് കേന്ദ്രമന്ത്രി സ്മൃതി ഇറാനി അമേതിയില്‍ സജീവമാകുന്നത്. കഴിഞ്ഞ ലോക്‌സഭ തിരഞ്ഞെടുപ്പില്‍ അമേതിയിലെ ബിജെപി സ്ഥാനാര്‍ത്ഥിയായി മത്സരിച്ച സ്മൃതി കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയോടാണ് തോറ്റത്. അമേതിയിലെ നാല് പ്രധാന മണ്ഡലങ്ങളില്‍ ജനസമ്പര്‍ക്ക പരിപാടികളില്‍ സ്മൃതി പങ്കെടുക്കും. കൂടാതെ റായ് ബറേലിയില്‍ നടക്കുന്ന പൊതുസമ്മേളനത്തില്‍ പ്രധാനമന്ത്രി സുരക്ഷ ഇന്‍ഷുറന്‍സ് പദ്ധതിയുടെ ഉദ്ഘാടനവും നിര്‍വഹിക്കും.
മെയ് 18ന് രാഹുല്‍ ഗാന്ധി അമേതിയിലെത്തി ജനങ്ങളെ കണ്ടിരുന്നു. അതിനിടെ വികസനത്തിന് എതിരായാണ് പ്രതിപക്ഷത്തിന്റെ പ്രവര്‍ത്തനങ്ങളെന്ന് കേന്ദ്ര ഗതാഗതമന്ത്രി നിതിന്‍ ഗഡ്കരി ആരോപിച്ചു. വികസനം തടയാനായി പ്രതിപക്ഷം ഭൂമിയേറ്റെടുക്കല്‍ ബില്ലിനെതിരെ പ്രചാരണം നടത്തുകയാണെന്ന് ബിജെപി യോഗത്തെ അഭിസംബോധന ചെയ്തു കൊണ്ട് അദ്ദേഹം വ്യക്തമാക്കി. പ്രതിരോധവും സുരക്ഷയും കണക്കിലെടുത്താണ് അനുമതി നല്‍കുന്നതടക്കമുള്ള നിബന്ധനകള്‍ ഒഴിവാക്കിയതെന്നും പറഞ്ഞു
സര്‍ക്കാര്‍ ഫണ്ടുകളില്‍ അപര്യാപ്തത നേരിടുന്നില്ലെന്ന് വ്യക്തമാക്കിയ ഗഡ്കരി മഹാരാഷ്ട്രയില്‍ ഒരുലക്ഷം കോടി രൂപ ചെലവില്‍ റോഡു നിര്‍മ്മാണം നടത്തുമെന്ന് ഉറപ്പു നല്‍കി. ഗ്രാമപ്രദേശങ്ങളില്‍ വ്യാവസായികമുന്നേറ്റം സാധ്യമാക്കാനാണ് സര്‍ക്കാരിന്റെ ശ്രമം. യുവജനങ്ങള്‍ തൊഴിലിനു വേണ്ടി നഗരങ്ങളെ ആശ്രയിക്കേണ്ട അവസ്ഥ കണക്കിലെടുത്താണ് ഇത്തരം പദ്ധതികള്‍ നടപ്പാക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha