പ്രധാനമന്ത്രി നരേന്ദ്രമോഡി നാളെ കൊച്ചിയിലെ പാര്‍ട്ടി കോര്‍ കമ്മിറ്റിയോഗത്തില്‍ പങ്കെടുക്കും. യു.ഡി.എഫിന്റെ ഐശ്വര്യ കേരള യാത്ര പാതിവഴിയില്‍ എത്തിനില്‍ക്കുകയും എല്‍.ഡി.എഫിന്റെ വികസന മുന്നേറ്റ ജാഥക്ക് തുടക്കം കുറിച്ചിരിക്കുകയും ചെയ്ത സാഹചര്യത്തില്‍ സുരേന്ദ്രന്റെ വിജയയാത്ര തുടങ്ങാനിരിക്കെയാണ് പ്രധാനമന്ത്രിയുടെ സന്ദര്‍ശനം. കൊച്ചിയിലെ വികസന പദ്ധതികളുടെ ഉദ്ഘാടനശേഷമാണ് ബി.ജെ.പിയുടെ നിര്‍ണായക കോര്‍ കമ്മിറ്റിയോഗം.കേരള ഘടകത്തിന്റെ അഭ്യര്‍ത്ഥന പരിഗണിച്ചാണ് പാര്‍ട്ടിയോഗത്തിന് പ്രധാനമന്ത്രി അനുമതി നല്‍കിയത്.സംസ്ഥാനഘടകത്തിന്റെ ഇതുവരെയുള്ള പ്രവര്‍ത്തനങ്ങള്‍ മോദി പങ്കെടുക്കുന്ന യോഗം വിലയിരുത്തും.അതേ സമയം പ്രധാനമന്ത്രിയുടെ കേരളത്തിലേക്കുള്ള സന്ദര്‍ശന വിവരം മലയാളത്തിലാണ് അദ്ദേഹം ട്വിറ്ററില്‍ കുറിച്ചത്.കേരളത്തിലെ ജനങ്ങള്‍ക്കിടയിലേയ്ക്ക് എത്തുന്നത് ഉറ്റുനോക്കുകയാണെന്നും നാളെ കൊച്ചിയില്‍ നടക്കുന്ന പരിപാടിയില്‍ പ്രാദേശിക അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനും വാണിജ്യം അഭിവൃദ്ധിപ്പെടുത്തുന്നതിനും സംസ്ഥാനത്തെ യുവാക്കള്‍ക്ക് അവസരങ്ങള്‍ സൃഷ്ടിക്കുന്നതിനുമായി നിരവധി വികസന പ്രവര്‍ത്തനങ്ങള്‍ക്ക് തുടക്കമിടുമെന്നുമാണ് പ്രധാനമന്ത്രിയുടെ ട്വീറ്റ്. നേരത്തെ കേരളീയരുടെ ചില ആഘോഷവേളകളിലും മലയാളത്തില്‍ ആശംസകളറിയിച്ച് പ്രധാനമന്ത്രി ട്വീറ്റ് ചെയ്തിരുന്നു.