സുധ കൊങ്കര സംവിധാനം ചെയ്‌ത സൂരറൈ പോട്ര് ഓസ്‌കാര്‍ പുരസ്‌കാരത്തിന് യോഗ്യത നേടി. ആദ്യഘട്ടത്തിൽ തിരഞ്ഞെടുത്ത 366 ചിത്രങ്ങളോടൊപ്പമാണ് സുരറൈ പോട്രും ഇടംപിടിച്ചിരിക്കുന്നത്.
ചിത്രത്തിന്റെ സഹനിര്‍മ്മാതാവായ രാജശേഖര്‍ പാണ്ഡ്യനാണ് സമൂഹമാധ്യമങ്ങളിലൂടെ പുറത്ത്‌വിട്ടിരിക്കുന്നത്. ജനറൽ ക്യാറ്റഗറിയിലാണ് ചിത്രം മത്സരിക്കുന്നത്.

ആമസോൺ പ്രൈമിലൂടെ റിലീസിനെത്തിയ സൂരറൈ പോട്രിന് മികച്ചപ്രതികരണമായിരുന്നു ലഭിച്ചത്. ചിത്രത്തിലെ അഭിനേതാക്കളായ സൂര്യയ്ക്കും അപർണയ്ക്കും പ്രേക്ഷകരുടെ ഇടയിൽ വലിയ സ്വീകാര്യതയാണിപ്പോൾ.

എയര്‍ ഡെക്കാന്‍ വിമാന കമ്പനി സ്ഥാപകന്‍ ക്യാപ്‌റ്റന്‍ ഗോപിനാഥിന്റെ ജീവിതത്തെ ആസ്‌പദമാക്കിയായിരുന്നു ചിത്രത്തിന്റെ കഥ. ചുരുങ്ങിയ ചെലവില്‍ സാധാരണക്കാര്‍ക്ക് കൂടി യാത്രചെയ്യാന്‍ കഴിയുന്ന വിമാന സര്‍വീസ് ഒരുക്കുക എന്ന ലക്ഷ്യത്തിലേക്കുളള അദ്ദേഹത്തിന്റെ യാത്രയാണ് ചിത്രത്തില്‍ സൂര്യ അവതരിപ്പിച്ചിരിക്കുന്നത്. അപര്‍ണ ബാലമുരളി, ഉര്‍വ്വശി, പരേഷ് റാവല്‍ തുടങ്ങിയവരായിരുന്നു ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചത്.

കൊവിഡ് പ്രതിസന്ധിയുളളതിനാല്‍ മത്സര ചിത്രങ്ങള്‍ക്കുളള നിയമങ്ങളില്‍ അക്കാദമി പലവിധ മാറ്റങ്ങളും വരുത്തിയതാണ്. സാധാരണ ജൂറി അംഗങ്ങള്‍ക്കായി ലോസാഞ്ചല്‍സില്‍ സിനിമയുടെ അണിയറപ്രവര്‍ത്തകര്‍ തന്നെയാണ് ഷോ സംഘടിപ്പിക്കുന്നത്. എന്നാല്‍ ഇത്തവണ ഓണ്‍ലൈനായാണ്‌ ജൂറി അംഗങ്ങള്‍ സിനിമ കണ്ടിരിക്കുന്നത്. അടുത്ത ഘട്ടത്തില്‍ ഈ മാസം 28 മുതല്‍ യു എസിലെ ആറ് പ്രധാന നഗരങ്ങളിലെ ഏതെങ്കിലും തിയേറ്ററുകളില്‍ ചിത്രം പ്രദർശിപ്പിക്കണം.