ഭീമ കൊറേഗാവ് കേസില്‍ യുഎപിഎ ചുമത്തപ്പെട്ട് കഴിഞ്ഞ രണ്ട് വര്‍ഷമായി ജയിലില്‍ കഴിയുകയായിരുന്ന കവി വരവരറാവു ജയില്‍മോചിതനായി.

ആരോഗ്യ കാരണങ്ങള്‍ ചൂണ്ടിക്കാട്ടി ബോംബെ ഹൈക്കോടതി ഫെബ്രുവരി 22-നാണ് വരവരറാവുവിന് ജാമ്യം അനുവദിച്ചത്. അതിന് ശേഷം മുംബൈ നാനാവതി ആശുപത്രിയില്‍ ചികിത്സയിലായിരുന്നു റാവു. ശനിയാഴ്ച രാത്രി വൈകിയാണ് വരവരറാവുവിനെ ആശുപത്രിയില്‍ നിന്ന് ഡിസ്ചാര്‍ജ് ചെയ്തത്. അഭിഭാഷകയായ ഇന്ദിരാ ജയ്‌സിംഗാണ് റാവുവിന്റെ ചിത്രം ട്വീറ്റ് ചെയ്തത്.

ഇന്നലെ രാത്രി വൈകിയാണ് വരവരറാവുവിനെ ആശുപത്രിയില്‍ നിന്ന് ഡിസ്ചാര്‍ജ് ചെയ്തത്. അഭിഭാഷകയായ ഇന്ദിരാ ജയ്‌സിംഗാണ് റാവുവിന്റെ ചിത്രം ട്വീറ്റ് ചെയ്തത്. ''ഒടുവില്‍ മോചിതന്‍'' എന്ന അടിക്കുറിപ്പോടെയാണ് ഇന്ദിരാ ജയ്‌സിംഗ് ചിത്രം പോസ്റ്റ് ചെയ്തത്.അതേസമയം മുംബൈ വിട്ടുപോകരുതെന്നും, പൊലീസ് എപ്പോള്‍ വിളിച്ചാലും ഹാജരാകണമെന്നുമുള്ള ഉപാധികളോടെയാണ് വരവരറാവുവിന് കോടതി ജാമ്യം അനുവദിച്ചിരിക്കുന്നത്.

പാസ്‌പോര്‍ട്ട് എന്‍ഐഎയ്ക്ക് മുന്നില്‍ കെട്ടിവയ്ക്കണം, കേസിലെ മറ്റ് പ്രതികളുമായി യാതൊരു തരത്തിലും ബന്ധപ്പെടാന്‍ പാടില്ല, അരലക്ഷം രൂപയും ആള്‍ജാമ്യവും കോടതിയ്ക്ക് മുന്നില്‍ കെട്ടിവയ്ക്കണം എന്നിവയാണ് മറ്റ് ജാമ്യവ്യവസ്ഥകള്‍. 2018ആഗസ്റ്റ് 28 മുതല്‍ വരവരറാവു ജയിലിലാണ്. കേസിന്റെ വിചാരണ പോലും തുടങ്ങിയിട്ടുമില്ല. ആരോഗ്യകാരണങ്ങള്‍ ചൂണ്ടിക്കാട്ടി പല തവണ വരവരറാവുവിന്റെ കുടുംബം കോടതിയെ സമീപിച്ചിരുന്നു. എന്നാല്‍ ജാമ്യം നിഷേധിക്കപ്പെട്ടു.

365 ദിവസത്തില്‍ 149 ദിവസവും വരവരറാവു ആശുപത്രിയിലായിരുന്നെന്നും, ഗുരുതരമായ ആരോഗ്യപ്രശ്‌നങ്ങളുള്ള റാവുവിനെ തലോജ ജയിലില്‍ നിന്ന് മാറ്റി, ഹൈദരാബാദിലെ വീട്ടില്‍ കഴിയാന്‍ അനുവദിക്കണമെന്നും റാവുവിന് വേണ്ടി ഹാജരായ ഇന്ദിരാജയ്‌സിംഗ് വാദിച്ചു.

ഈ വാദം അംഗീകരിച്ച ബോംബെ ഹൈക്കോടതി, ഇനിയും വരവരറാവുവിന് ജാമ്യം നല്‍കിയിട്ടില്ലെങ്കില്‍ അത് മനുഷ്യാവകാശങ്ങള്‍ അവഗണിക്കുന്നത് പോലെയാകുമെന്ന് നിരീക്ഷിച്ചിരുന്നു.

2017 ഡിസംബര്‍ 31-ന് പുനെയില്‍ നടന്ന എല്‍ഗാര്‍ പരിഷദ് എന്ന സംവാദപരിപാടിയില്‍ നടന്ന പ്രകോപനപരമായ പ്രസംഗങ്ങളാണ് പിറ്റേന്ന് ഭിമ- കൊറേഗാവ് യുദ്ധസ്മാരകത്തിന് സമീപത്തുണ്ടായ അക്രമസംഭവങ്ങള്‍ക്ക് വഴിവച്ചതെന്ന കേസിലാണ് വരവരറാവു അറസ്റ്റിലാവുന്നത്.

ദേശീയ അന്വേഷണ ഏജന്‍സിയാണ് കേസന്വേഷിക്കുന്നത്. മാവോയിസ്റ്റുകളുമായി ചേര്‍ന്ന് വരവരറാവു ഉള്‍പ്പടെയുള്ളവര്‍ ഗൂഢാലോചന നടത്തി അക്രമങ്ങള്‍ ആസൂത്രണം ചെയ്‌തെന്നാണ് എന്‍ഐഎ കേസ്. ''വീരസം'' എന്ന, വിപ്ലവാഭിമുഖ്യമുള്ള എഴുത്തുകാരുടെ സംഘടനയുടെ തലപ്പത്തുള്ള വരവരറാവുവിന് അക്രമങ്ങള്‍ ആസൂത്രണം ചെയ്യുന്നതില്‍ നിര്‍ണായകപങ്കുണ്ടെന്ന് എന്‍ഐഎ ആരോപിക്കുന്നു.

എന്നാല്‍ ആരോപണങ്ങളെല്ലാം ശക്തമായി വരവരറാവു കോടതിയില്‍ നിഷേധിച്ചിരുന്നു.