കോവിഡ് കേസുകള്‍ കുതിച്ചുയരുന്ന സാഹചര്യത്തില്‍ മുംബൈയില്‍ സമ്പൂര്‍ണ്ണ ലോക്ക്ഡൗണ്‍ പ്രഖ്യാപിക്കേണ്ടി വരുമെന്ന മുന്നറിയിപ്പുമായി മഹാരാഷ്ട്ര മുഖ്യമന്ത്രി ഉദ്ധവ് താക്കറെ.

കഴിഞ്ഞ ദിവസം മാത്രം ഇവിടെ 1709 കോവിഡ് കേസുകളാണ് റിപ്പോര്‍ട്ട് ചെയ്യപ്പെട്ടത്. ഈ വര്‍ഷം രാജ്യത്തെ സാമ്ബത്തിക തലസ്ഥാനത്ത് റിപ്പോര്‍ട്ട് ചെയ്യപ്പെടുന്ന ഏറ്റവും ഉയര്‍ന്ന പ്രതിദിന കണക്ക് കൂടിയാണിത്. പ്രതിരോധ മാര്‍ഗ്ഗങ്ങള്‍ കര്‍ശനമാക്കിയിട്ടും ജനങ്ങള്‍ അലംഭാവം തുടരുന്ന സാഹചര്യത്തിലാണ് ലോക്ക് ഡൗണ്‍ എന്ന അന്തിമ മുന്നറിയിപ്പ് താക്കറെ നല്‍കിയിരിക്കുന്നത്.



ഹോട്ടലുകളും മാളുകളും അടയ്ക്കാന്‍ തനിക്ക് താത്പ്പര്യമില്ലെന്ന് എടുത്ത് പറഞ്ഞ മുഖ്യമന്ത്രി, അടച്ചുപൂട്ടല്‍ വേണമെന്നാണോ ആഗ്രഹിക്കുന്നതെന്ന ചോദ്യവും ജനങ്ങളോട് ഉന്നയിച്ചു.

കോവിഡ് സുരക്ഷാ മാനദണ്ഡങ്ങള്‍ കൃത്യമായി തന്നെ പാലിക്കണമെന്ന കാര്യം ഊന്നിപ്പറഞ്ഞ താക്കറെ, മാസ്‌ക്-സാമൂഹിക അകലം ഉള്‍പ്പെടെ എല്ലാ പ്രതിരോധ ചട്ടങ്ങളും പാലിക്കപ്പെടുന്നുവെന്ന് ഉറപ്പാക്കണമെന്നും നിര്‍ദേശിച്ചു.



കോവിഡ് വ്യാപനം കൂടുന്ന സാഹചര്യത്തില്‍ ജനങ്ങളോട് കൂടുതല്‍ കരുതല്‍ പാലിക്കണമെന്ന അഭ്യര്‍ഥനയുമായി ബൃഹത് മുംബൈ കോര്‍പ്പറേഷന്‍ അധികൃതരും രംഗത്തെത്തിയിട്ടുണ്ട്. കോവിഡ് 19ന്റെ ഗ്രാഫ് ഉയരുന്നത് ശ്രദ്ധിച്ച് വൈറസ് വ്യാപനം നിയന്ത്രിക്കാന്‍ സഹായിക്കണമെന്നാണ് ഇവര്‍ ജനങ്ങളോട് അഭ്യര്‍ഥിച്ചിരിക്കുന്നത്.

കോവിഡ് ഗ്രാഫ് എങ്ങനെ പോകണം എന്നത് നമ്മുടെ കൈകളിലാണുള്ളത്. മുംബൈയില്‍ വൈറസ് കൂടുതല്‍ വ്യാപിക്കാന്‍ അനുവദിക്കാതിരിക്കാം. നിങ്ങളുടെ സഹായമില്ലാതെ ഇത് നടക്കില്ല'. ബിഎംസി അധികൃതര്‍ സോഷ്യല്‍മീഡിയയിലൂടെ അഭ്യര്‍ഥിക്കുന്നു. കോവിഡ് വ്യാപനം ഏറ്റവും രൂക്ഷമായി വ്യാപിച്ച സംസ്ഥാനങ്ങളിലൊന്നാണ് മഹാരാഷ്ട്ര. ഇവിടെ മുംബൈയിലായിരുന്നു രോഗവ്യാപനം കൂടുതല്‍.

ഇടയ്ക്ക് കാര്യങ്ങളൊക്കെ നിയന്ത്രണത്തില്‍ വന്നെങ്കിലും ഒരിടവേളയ്ക്ക് ശേഷം വീണ്ടും കേസുകള്‍ വര്‍ധിച്ചു വരികയാണ്. നിലവില്‍ കര്‍ശന നിയന്ത്രണങ്ങള്‍ നടപ്പിലാക്കി വരുന്നുണ്ടെങ്കിലും രോഗവ്യാപനം ഉയര്‍ന്ന് തന്നെ നില്‍ക്കുന്ന സാഹചര്യത്തിലാണ് ലോക്ക് ഡൗണ്‍ എന്ന ഭീഷണി മുഖ്യമന്ത്രി നല്‍കിയിരിക്കുന്നത്.

ലോക്ക്ഡൗണ്‍ എന്ന ആശയത്തോട് താത്പ്പര്യമില്ലെന്ന് മുമ്ബ് പലതവണ പറഞ്ഞിട്ടുള്ള മഹാരാഷ്ട്ര സര്‍ക്കാര്‍, 'മാസ്‌ക് ധരിക്കു, ലോക്ക് ഡൗണിനോട് നോ പറയു'എന്ന മുദ്രാവാക്യത്തിലൂന്നിയാണ് കോവിഡ് പ്രതിരോധപ്രവര്‍ത്തനങ്ങള്‍ നടത്തി വന്നിരുന്നത്.

എന്നാല്‍ രോഗവ്യാപനം നിയന്ത്രിക്കാനാകാത്ത സാഹചര്യത്തില്‍ നഗരം ലോക്ക് ഡൗണിലേക്ക് നീങ്ങുന്ന സാഹചര്യമാണ്. മുംബൈ മേയറും ഇക്കാര്യം സംബന്ധിച്ച് സൂചന നല്‍കിയിട്ടുണ്ട്. ജനങ്ങള്‍ കോവിഡ് മാനദണ്ഡങ്ങള്‍ ലംഘിക്കുന്നത് തുടര്‍ന്നാല്‍ നഗരത്തില്‍ സമ്ബൂര്‍ണ്ണ ലോക്ക് ഡൗണ്‍ നടപ്പിലാക്കുമെന്നാണ് അദ്ദേഹം അറിയിച്ചിരിക്കുന്നത്.