കോവിഡ് വ്യാപനം രൂക്ഷമാകുന്ന സാഹചര്യത്തില്‍ കേരളത്തില്‍ നിന്നുള്ള യാത്രക്കാര്‍ക്ക് നിയന്ത്രണങ്ങള്‍ ഏര്‍പ്പെടുത്തി കര്‍ണാടക. ആര്‍ടിപിസിആര്‍ ടെസ്റ്റ് നടത്തി നെഗറ്റീവായവര്‍ക്ക് മാത്രമെ സംസ്ഥാനത്തേക്ക് പ്രവേശനം അനുവദിക്കൂവെന്നാണ് പുതിയ നിര്‍ദ്ദേശം.

തലപ്പാടിയില്‍ ഉള്‍പ്പെടെ ബസുകള്‍ നിര്‍ത്തി പരിശോധന നടത്തിയ ശേഷമാണ് ഇപ്പോള്‍ സംസ്ഥാനത്തേക്ക് കടത്തി വിടുന്നത്. കോവിഡ് നെഗറ്റീവ് സര്‍ട്ടിഫിക്കറ്റ് ഇല്ലാത്തവര്‍ക്ക് ഇന്ന് ഒരു ദിവസത്തേക്ക് ഇളവ് നല്‍കിയിട്ടുണ്ട്.

എന്നാല്‍ നാളെ മുതല്‍ അതിര്‍ത്തിയില്‍ കോവിഡ് നെഗറ്റീവ് സര്‍ട്ടിഫിക്കറ്റ് നിര്‍ബന്ധമാണ്. വെള്ളിയാഴ്ച്ച 1,488 പുതിയ കേസുകളാണ് കര്‍ണാടകയില്‍ റിപ്പോര്‍ട്ട് ചെയ്തത്. ഇതില്‍ 925 കേസുകള്‍ ബംഗളൂരുവില്‍ നിന്നാണ് റിപ്പോര്‍ട്ട് ചെയ്യപ്പെട്ടത്.

അതേസമയം ഒരു ഇടവേളയ്ക്ക് ശേഷം രാജ്യത്ത് കൊവിഡ് നിരക്ക് കുതിച്ചുയരുന്നു. കഴിഞ്ഞ 24 മണിക്കൂറിനിടെ 39,726 പേര്‍ക്ക് രോഗം സ്ഥിരീകരിച്ചു. പ്രതിദിന രോഗബാധിതരുടെ എണ്ണം ഈ വര്‍ഷം ഏറ്റവും കൂടുതല്‍ രേഖപ്പെടുത്തിയ ദിവസമാണിന്ന്.

ഇതോടെ ആകെ കൊവിഡ് സ്ഥിരീകരിച്ചവരുടെ എണ്ണം 1,15,14,331 ആയെന്ന് കേന്ദ്ര ആരോഗ്യമന്ത്രാലയം അറിയിച്ചു.തുടര്‍ച്ചയായി ഒന്‍പതാം ദിവസവും ആക്ടീവ് കേസ് ലോഡ് ഉയര്‍ന്ന് 2,71,282 ആയി. ആകെ രോഗവ്യാപനത്തിന്റെ 2.36 ശതമാനമാണിത്.

രാജ്യത്ത് കൊവിഡ് മുക്തിനിരക്ക് 96.26ആയി ഇടിഞ്ഞു. 154 പേരാണ് കൊവിഡ് മൂലം 24 മണിക്കൂറിനിടെ മരണമടഞ്ഞത്. ഇതോടെ ആകെ മരണനിരക്ക് 1,59,370 ആയി. രോഗമുക്തി നേടിയവരുടെ എണ്ണം 1,10,83,679 ആണ്. രാജ്യത്ത് കൊവിഡ് നിരക്ക് 20 ലക്ഷം കടന്നത് ആഗസ്റ്റ് ഏഴിനാണ്.

40ലക്ഷം കടന്നത് സെപ്തംബര്‍ അഞ്ചിനും 50 ലക്ഷം കടന്നത് സെപ്തംബര്‍ 16നാണ്. ഒരു കോടി കടന്നത് ഡിസംബര്‍ 19നായിരുന്നു. ഇതിനുശേഷം കുറഞ്ഞ കൊവിഡ് നിരക്കില്‍ ഇപ്പോള്‍ ഉയര്‍ച്ച ഉണ്ടായിരിക്കുകയാണ്.