ഇന്ത്യയും പാക്കിസ്ഥാനും പലപ്പോഴും നേര്‍ക്കുനേര്‍ വരാറുണ്ട്. വാക് യുദ്ധവും, അല്ലാത്ത യുദ്ധവും ഒക്കെ കണ്ടിട്ടുണ്ട്. ഇപ്പോഴിതാ പാക്കിസ്ഥാന് ശരിക്കും ഉരുളയ്ക്ക് ഉപ്പേരി പോലെ മറുപടി കൊടുത്തിരിക്കുകയാണ് ഇന്ത്യ.

ഇന്ത്യയും പാകിസ്താനും ഭൂതകാലം മറന്ന് ഒരുമിച്ച് മുന്നോട്ട് പോകേണ്ട സമയമായെന്ന് പാകിസ്താന്‍ ആര്‍മി ചീഫ് ജനറല്‍ ഖമര്‍ ജാവേദ് ബജ്വ. എന്നാല്‍ ഇരുരാജ്യങ്ങളും തമ്മില്‍ സമാധാനം പുനസ്ഥാപിക്കാനുള്ള മികച്ച സംഭാഷണം നടക്കണമെങ്കില്‍ ഇന്ത്യ ജമ്മു കശ്മീരില്‍ അനുയോജ്യമായ അന്തരീക്ഷം സൃഷ്ടിക്കണമെന്നും പാകിസ്താന്‍ ആവശ്യപ്പെട്ടു.

'ആണവശക്തികളായ രണ്ട് രാജ്യങ്ങള്‍ക്കിടയിലുള്ള തര്‍ക്കങ്ങളും പ്രശ്നങ്ങളും പരിഹരിക്കുന്നതിന് കശ്മീരിലെ വിഷയം ഒരു തടസമായി തുടരുകയാണ്. കശ്മീരാണ് പ്രശ്നങ്ങളുടെ പ്രധാന ബിന്ദു. സമാധാനപരമായ മാര്‍ഗങ്ങളിലൂടെ കശ്മീര്‍ തര്‍ക്കം പരിഹരിച്ചില്ലെങ്കില്‍ അന്താരാഷ്ട്ര തലത്തിലുള്ള പല ഉടമ്പടികളും തെറ്റാന്‍ സാധ്യതയുണ്ടെന്നും' സൈനിക മേധാവി വ്യക്തമാക്കി.

ജമ്മു കശ്മീരിലും മറ്റ് നിയന്ത്രണമേഖലയിലും വെടിനിര്‍ത്തല്‍ കരാര്‍ കര്‍ശനമായി പാലിക്കുമെന്ന് ഇന്ത്യയും പാകിസ്താനും ഫെബ്രുവരി 25ന് വീണ്ടും തീരുമാനിച്ചിരുന്നു. ഈ നിമിഷം വരെ വെടിനിര്‍ത്തല്‍ തുടരുകയാണ്. ഇത് നല്ല സൂചനയാണെന്നും അദ്ദേഹം പറഞ്ഞു.

കശ്മീരിലെ ജനങ്ങളുടെ താത്പര്യങ്ങള്‍ക്ക് അനുസൃതമായി പാകിസ്താനും ഇന്ത്യയും ജമ്മു കശ്മീരിലെ പ്രശ്നം മാന്യമായും സമാധാനപരമായും പരിഹരിക്കണമെന്നും ബജ്വ പറഞ്ഞിരുന്നു. അതേസമയം പാകിസ്താന്‍ ആദ്യം സ്വന്തം രാജ്യത്തെ ഭീകരത അവസാനിപ്പിച്ച് സമാധാനം പുനസ്ഥാപിക്കാന്‍ ശ്രമിക്കണമെന്ന് ഇന്ത്യ മറുപടിയായി പറഞ്ഞു. ഇന്ത്യ സമാധാനം ആഗ്രഹിക്കുന്നുണ്ട്.

എന്നാല്‍ പാകിസ്താന്‍ ആദ്യം സ്വന്തം രാജ്യത്തിനുള്ളിലെ ഭീകരത അവസാനിപ്പിച്ച് പുറത്ത് വരാന്‍ തയ്യാറാകണം. ഭീകരതയും ശത്രുതയും ഇല്ലാത്ത അന്തരീക്ഷത്തില്‍ പാകിസ്താനുമായി സാധാരണ അയല്‍രാജ്യ ബന്ധമാണ് ഇന്ത്യ ആഗ്രഹിക്കുന്നതെന്ന് ഇന്ത്യ കഴിഞ്ഞ മാസം പറഞ്ഞിരുന്നു.

ശത്രുതയും ഭീകരതയും ഇല്ലാത്ത അന്തരീക്ഷം സൃഷ്ടിക്കുന്നതിനുള്ള ഉത്തരവാദിത്തം പാകിസ്താനാണെന്നും ഇന്ത്യ വ്യക്തമാക്കിയിരുന്നു.