ഭാര്യയ്ക്ക് മറ്റൊരു യുവാവുമായി രഹസ്യ ബന്ധമുണ്ടെന്ന സംശയത്തെ തുടര്‍ന്ന് യുവതിയുടെ സ്വകാര്യ ഭാഗം ഭര്‍ത്താവ് അലൂമിനിയം നാര് കൊണ്ട് തുന്നിക്കെട്ടി. ഉത്തര്‍പ്രദേശിലെ രാംപുര്‍ ജില്ലയിലെ മിലാക്കിലാണ് യുവാവിന്റെ കൊടുംക്രൂരത. ഗുരുതരാവസ്ഥയിലായ യുവതിയെ ആശുപത്രിയില്‍ പ്രവേശിപ്പിച്ചിരിയ്ക്കുകയാണ്. സംഭവവുമായി ബന്ധപ്പെട്ട് ഭര്‍ത്താവിനെ അറസ്റ്റ് ചെയ്തു. രണ്ട് വര്‍ഷം മുമ്പായിരുന്നു ഇരുവരുടെയും വിവാഹം.

മിലാക്ക് സ്വദേശിയും ഡ്രൈവറുമായ യുവാവ് ഇന്നലെ ആയിരുന്നു ഭാര്യയോട് കണ്ണില്‍ച്ചോരയില്ലാത്ത ക്രൂരത കാണിച്ചത്. ഭാര്യയ്ക്ക് രഹസ്യ ബന്ധമുണ്ടെന്ന് ഇയാള്‍ക്ക് സംശയമായിരുന്നു. തുടര്‍ന്ന് ചാരിത്ര പരിശോധന നടത്തണമെന്ന് ഇയാള്‍ ആവശ്യപ്പെടുകയായിരുന്നു.

എന്നാല്‍ യുവതി ഇതിന് വിസമ്മതിച്ചതോടെ കൈകാലുകള്‍ ബന്ധിച്ചു. ഇതിന് ശേഷം അലൂമിനിയം നാര് ഉപയോഗിച്ച്‌ സ്വകാര്യ ഭാഗം തുന്നിക്കെട്ടുകയും ചെയ്യ്തു. മാരകമായ മുറിവേറ്റ് യുവതിക്ക് രക്തസ്രാവമുണ്ടായതോടെ ഭര്‍ത്താവ് വീട്ടില്‍ നിന്നു രക്ഷപെടുകയായിരുന്നു.

തുടർന്ന് യുവതി സമീപ ഗ്രാമത്തില്‍ താമസിക്കുന്ന മാതാവിനെ വിളിച്ചു വരുത്തി. അമ്മയായിരുന്നു യുവതിയെ ആശുപത്രിയില്‍ എത്തിച്ചത്. വൈദ്യ പരിശോധനയില്‍ യുവതിക്ക് ഗുരുതര പരിക്കേറ്റതായി അധികൃതർ അറിയിച്ചു.

ഇവരെ ജില്ലാ ആശുപത്രിയില്‍ പ്രവേശിപ്പിച്ച്‌ കൃത്യമായ ചികിത്സ ഉറപ്പുവരുത്തിയെന്നും യുവതിയുടെയും മാതാവിന്റെയും പരാതിയില്‍ പ്രതിയെ പിടികൂടിയതായും പൊലീസ് അറിയിച്ചു.

ഒരു കാരണവുമില്ലാതെ ഭര്‍ത്താവ് തന്നെ മര്‍ദിക്കുന്നത് പതിവായിരുന്നുവെന്ന് യുവതി പോലീസിനോട് പറഞ്ഞു. തനിക്ക് രഹസ്യ ബന്ധമുണ്ടെന്ന് ഭര്‍ത്താവിന് സംശയമാണെന്നും. എന്നാല്‍ ഇത്തരമൊരു ക്രൂരത തന്നോട് ഭര്‍ത്താവ് ചെയ്യുമെന്ന് ഒരിക്കലും കരുതിയിരുന്നില്ലെന്ന് യുവതി വ്യക്തമാക്കി.