പ്രധാനമന്ത്രി നരേന്ദ്രമോദിയുടെ ബംഗ്ലാദേശ്​ സന്ദര്‍ശനത്തിനെതിരെ ബംഗാള്‍ മുഖ്യമന്ത്രി മമത ബാനര്‍ജി. പശ്ചിമ ബംഗാളില്‍ ആദ്യ​ഘട്ട വോ​​ട്ടെടുപ്പ്​ ആരംഭിക്കേ വോട്ടര്‍മാരെ സ്വാധീനിക്കാനാണ്​ മോദി ബംഗ്ലാദേശിലെത്തിയതെന്ന്​ മമത ആരോപിച്ചു.

'ഇവിടെ തെ​രഞ്ഞെടുപ്പ്​ നടന്നു​കൊണ്ടിരിക്കുന്നു. അദ്ദേഹം ബംഗ്ലാദേശിലെത്തി ബംഗാളിനെക്കുറിച്ച്‌​ പ്രസംഗിക്കുന്നു. ഇത്​ തെരഞ്ഞെടുപ്പ്​ പെരുമാറ്റച്ചട്ട ലംഘനമാണ്​' -ഖാരഗ്​പുരില്‍ തെരഞ്ഞെടുപ്പ്​ പ്രചാരണത്തിനിടെ മമത ബാനര്‍ജി പറഞ്ഞു.

'2019 ലോക്​സഭ തെര​ഞ്ഞെടുപ്പില്‍ ബംഗ്ലാദേശി നടന്‍ ഞങ്ങളുടെ റാലിയില്‍ പ​ങ്കെടുത്തതിനെ തുടര്‍ന്ന്​ ബി.ജെ.പി ബംഗ്ലാദേശിനോട്​ പറഞ്ഞ്​ അദ്ദേഹത്തിന്‍റെ വിസ റദ്ദാക്കി. ഇപ്പോള്‍ തെര​ഞ്ഞെടുപ്പ്​ നടക്കു​മ്പോള്‍ പ്രധാമന്ത്രി ഒരു കൂട്ടം ആളു​കളുടെ വോട്ട്​ ശേഖരിക്കാനായി ബംഗ്ലാദേശിലെത്തിയിരിക്കുന്നു. എന്തുകൊണ്ട്​ നിങ്ങളുടെ വിസ റദ്ദാക്കുന്നില്ല? ഞങ്ങള്‍ തെരഞ്ഞെടുപ്പ്​ കമീഷന്​ പരാതി നല്‍കും' -മമത ബാനര്‍ജി പറഞ്ഞു.

ബംഗ്ലാദേശ്​ സന്ദര്‍ശനത്തിനിടെ മോദി ഗോപാല്‍ഗഢ്​ ജില്ലയിലെ ഒരകണ്ഡിയില്‍ ക്ഷേത്ര ദര്‍ശനം നടത്തിയിരുന്നു. ഹിന്ദു മതുവ നേതാക്കളുമായി കൂടിക്കാഴ്ച നടത്തുകയും ചെയ്​തിരുന്നു. മതുവ മതവിഭാഗം ബംഗാളില്‍ തമാസിക്കുന്നുണ്ട്​. തെരഞ്ഞെടുപ്പില്‍ ഇവരുടെ വോട്ട്​ നിര്‍ണായകമാകും. മോദിയുടെ ഒരകണ്ഡി ക്ഷേത്രദര്‍ശനവും മതുവ നേതാക്കളുമായുള്ള കൂടിക്കാഴ്ചയും ​വോട്ട്​ബാങ്ക്​ ലക്ഷ്യമിട്ടാണെന്ന്​ മമത ആരോപിച്ചു. 'ചിലപ്പോള്‍ അവര്‍ പറയും ബംഗ്ലാദേശില്‍നിന്ന്​ മമത ആളെകൊണ്ടു​വന്ന്​ നുഴഞ്ഞുകയറ്റം നടത്തിയെന്ന്​. എന്നാല്‍ ഇപ്പോള്‍ പ്രധാനമന്ത്രി ബംഗ്ല​ാദേശിലെത്തി വോട്ട്​ കച്ചവടം നടത്തുകയാണ്​' -മമത പറഞ്ഞു. ബംഗാള്‍ നിയമസഭ തെരഞ്ഞെടുപ്പില്‍ ആദ്യ ഘട്ട വോ​ട്ടെടുപ്പ്​ പുരോഗമിക്കുകയാണ്​. എട്ടു ഘട്ടമായാണ്​ ഇവിടെ വോ​ട്ടെടുപ്പ്​.