കേരളത്തിനൊപ്പം നിയമസഭ തെരഞ്ഞെടുപ്പ് നടക്കുന്ന തമിഴ്നാട്ടില് സ്ഥാനാര്ത്ഥികള്ക്ക് വെല്ലുവിളിയായി കടുത്ത വേനല് ചൂട്...
കേരളത്തിനൊപ്പം നിയമസഭ തെരഞ്ഞെടുപ്പ് നടക്കുന്ന തമിഴ്നാട്ടില് കടുത്ത വേനല് ചൂട് സ്ഥാനാര്ഥികള്ക്ക് വെല്ലുവിളിയായി. അതിര്ത്തി ജില്ലയായ തേനി, സമീപ ജില്ലകളായ മധുര, ദിണ്ഡിഗല് എന്നിവിടങ്ങളിലെല്ലാം വേനല് ചൂട് വലിയ പ്രതിസന്ധിയാണ് സൃഷ്ടിക്കുന്നത്.
പകല് പ്രചാരണം മിക്ക സ്ഥലത്തും മുടങ്ങി. ചൂട് കൂടും മുമ്പ് ഓട്ടം തുടങ്ങുന്ന പ്രചാരണ വാഹനങ്ങള് ഉച്ചയാകുന്നതോടെ വിശ്രമത്തിലാകുകയാണ്.
സ്ഥാനാര്ഥികളും നേതാക്കളും വോട്ടര്മാരെ ഫോണില് ബന്ധപ്പെട്ടാണ് പല സ്ഥലത്തും വോട്ട് ചോദിക്കുന്നത്. വേനല് ചൂട് പോലെ കടുത്തതാണ് തേനി ജില്ലയിലെ പോരാട്ടങ്ങള്. ഇതില് ഏറെ ശ്രദ്ധേയം ബോഡിനായ്ക്കന്നൂര് മണ്ഡലത്തില് പഴയ രണ്ട് സഹപ്രവര്ത്തകര് തമ്മിലെ പോരാട്ടമാണ്.
തമിഴ്നാട് ഉപമുഖ്യമന്ത്രിയും ജയലളിതയുടെ വിശ്വസ്തനുമായിരുന്ന ഒ. പന്നീര്സെല്വവും ജയലളിതയുടെ മറ്റൊരു വിശ്വസ്തനായിരുന്ന തങ്ക തമിഴ് സെല്വവുമാണ് ഇവിടെ ഏറ്റുമുട്ടുന്നത്.
ജയലളിതയുടെ മരണത്തോടെ തങ്ക തമിഴ് സെല്വം എ.ഐ.എ.ഡി.എം.കെവിട്ട് ഡി.എം.കെയില് എത്തുകയായിരുന്നു. തമിഴ്നാട്ടില് പതിവായി കാണാറുള്ള തെരഞ്ഞെടുപ്പ് കോലാഹലങ്ങള്, കാതടപ്പിക്കുന്ന ഉച്ചഭാഷിണികള് എന്നിവയൊന്നുമില്ലാതെയാണ് പകല് മുഴുവന് പ്രചാരണം.
വോട്ടര്മാരെ നേരില് കാണുന്നതിനിടെ പണത്തിന് പകരം പാരിതോഷികങ്ങള് നല്കുന്നതായി ആക്ഷേപം ഉയര്ന്നിട്ടുണ്ട്. വോട്ടെടുപ്പ് ദിനം അടുക്കുന്നതോടെ ഇരുപക്ഷവും കളത്തില് കൂടുതല് സജീവമാകും.
https://www.facebook.com/Malayalivartha
