ഞായറാഴ്ചകളോ ഗസറ്റിലെ പൊതുഅവധികളോ നോക്കാതെ ഏപ്രിലില്‍ മുഴുവന്‍ ദിവസവും കോവിഡ് പ്രതിരോധകുത്തിവെപ്പ് നടത്തണമെന്ന സംസ്ഥാനങ്ങളോട് നിര്‍ദ്ദേശം നല്‍കി കേന്ദ്രം.

പൊതു, സ്വകാര്യ മേഖലയിലെ എല്ലാ വാക്‌സിനേഷന്‍ കേന്ദ്രങ്ങളും ഈ മാസം മുഴുവന്‍ പ്രവര്‍ത്തിക്കുന്നുവെന്ന് ഉറപ്പാക്കണമെന്നും വാക്‌സിനേഷന്‍ ഊര്‍ജിതമാക്കണമെന്നും കേന്ദ്ര ആരോഗ്യമന്ത്രാലയം സംസ്ഥാനങ്ങളോട് ആവശ്യപ്പെട്ടു.

45 വയസ്സിനുമുകളിലുള്ളവര്‍ക്കുള്ള പ്രതിരോധ കുത്തിവെപ്പ് വ്യാഴാഴ്ച തുടങ്ങിയ പശ്ചാത്തലവും രോഗവ്യാപനം കൂടിവരുന്നതും കണക്കിലെടുത്താണ് കേന്ദ്രനിര്‍ദേശം.

രാജ്യമൊട്ടുക്കും ആറരക്കോടി ഡോസുകള്‍ ഇതുവരെ കുത്തിവെച്ചു. 60-നുമുകളിലുള്ള 1,38,195 പേര്‍ വാക്‌സിന്റെ രണ്ടുഡോസുമെടുത്തു. ഒറ്റ ഡോസുമാത്രമെടുത്തവരുടെ എണ്ണം 3,83,48,737 ആണ്.

രണ്ടുഡോസും സ്വീകരിച്ച ആരോഗ്യപ്രവര്‍ത്തകര്‍ 52,50,704-ഉം കോവിഡ് മുന്നണിപ്പോരാളികള്‍ 39,45,796-ഉം ആണ്.

രാജ്യത്ത് 6.75 കോടി പേര്‍ക്ക് കോവിഡ് വാക്‌സിന്‍ നല്‍കിയതായി കേന്ദ്ര സര്‍ക്കാര്‍. ജനുവരി 16നാണ് രാജ്യത്ത് കോവിഡ് പ്രതിരോധ കുത്തിവയ്പ്പ് ആരംഭിച്ചത്. ആദ്യഘട്ടത്തില്‍ ആരോഗ്യപ്രവര്‍ത്തകര്‍ക്ക് മാത്രമാണ് കോവിഡ് വാക്‌സിന്‍ നല്‍കിയിരുന്നത്.

അടുത്തഘട്ടം മാര്‍ച്ച് ഒന്നിനാണ് ആരംഭിച്ചത്. 60 വയസിന് മുകളില്‍ പ്രായമുള്ളവര്‍ക്കാണ് ഈ ഘട്ടത്തില്‍ വാക്‌സിന്‍ നല്‍കിയിരുന്നത്. രാജ്യത്ത് നിലവില്‍ 6,75,36,392 പേര്‍ക്കാണ് കോവിഡ് വാക്‌സിന്‍ നല്‍കിയത്.

അതേസമയം, രോഗവ്യാപനം വിവിധ സംസ്ഥാനങ്ങളില്‍ കൂടിവരികയാണ്. വ്യാഴാഴ്ചവരെയുള്ള 24 മണിക്കൂറില്‍ 72,330 പുതിയ കേസുകളുണ്ടായി. കോവിഡ് ബാധിതകരുടെ 84.61 ശതമാനവും മഹാരാഷ്ട്ര, ഛത്തീസ്ഗഢ്, കര്‍ണാടകം. പഞ്ചാബ്, കേരളം, തമിഴ്നാട്, ഗുജറാത്ത്, മധ്യപ്രദേശ് എന്നീ സംസ്ഥാനങ്ങളിലാണ്.