വളരെ നീണ്ട കഠിനമായ പരിശീലനങ്ങള്‍ക്കൊടുവില്‍ ആദ്യമായി ഇന്ത്യന്‍ സൈന്യത്തിലെ മിലിട്ടറി പൊലീസിലേക്ക് വനിതകള്‍ ചുവടുവെക്കുന്നു.

ഇന്ത്യന്‍ സൈന്യത്തിലെ വനിതാ മിലിട്ടറി പൊലീസിന്റെ ആദ്യ ബാച്ചില്‍ ഉള്‍പ്പെട്ട 100 വനിതകളുടെ പരിശീലനം ബംഗളൂരുവില്‍ അന്തിമഘട്ടത്തിലാണ്.

ബംഗളൂരു ഓസ്റ്റിന്‍ ടൗണിലെ മിലിട്ടറി പൊലീസ് കോര്‍ (സി.എം.പി) ക്യാമ്പിലെ 61 ആഴ്ചത്തെ പരിശീലനം പൂര്‍ത്തിയാക്കി മേയ് എട്ടിന് 100 പേരും പുറത്തിറങ്ങുക പുതുചരിത്രത്തിലേക്കായിരിക്കും.ഓഫിസര്‍ റാങ്ക് പദവിക്കു കീഴില്‍ സൈന്യത്തില്‍ ആദ്യമായാണ് വനിതകളെ നിയമിക്കുന്നത്.

ലാന്‍സ് നായിക് റാങ്കിലായിരിക്കും ഇവര്‍ വിവിധ ഡിവിഷനുകളില്‍ നിയമിക്കപ്പെടുക. ഇവരില്‍ ആറു മലയാളികളുമുണ്ട്. പാലക്കാട് കല്‍പാതി സ്വദേശി മായ സജീഷ്, മലപ്പുറം സ്വദേശി ടി. വിസ്മയ, കൊല്ലം സ്വദേശികളായ എ. മാളു, ജനിക എസ്. ജയന്‍, തിരുവനന്തപുരം സ്വദേശികളായ പി.എസ്. അര്‍ച്ചന, എസ്.ആര്‍. ഗൗരി, എന്നിവരാണ് ആദ്യ മിലിട്ടറി പൊലീസ് ബാച്ചിലെ മലയാളികള്‍.

കഴിഞ്ഞ വര്‍ഷം ജനുവരി ആറിനാണ് ലെഫ്റ്റനന്റ് കേണല്‍ ജൂലിയുടെ നേതൃത്വത്തില്‍ പരിശീലനം ആരംഭിച്ചത്. 61 ആഴ്ചത്തെ പരിശീലനത്തില്‍ 29 ആഴ്ച അടിസ്ഥാനപരിശീലനവും 26 ആഴ്ച പ്രത്യേക പരിശീലനവുമാണ്. കരസേനയിലെ ക്രമസമാധാനപാലനം, അച്ചടക്കം തുടങ്ങിയ കാര്യങ്ങള്‍ ഇവര്‍ ശ്രദ്ധിക്കണം.

ബലാത്സംഗം, ലൈംഗികപീഡനം, മോഷണം തുടങ്ങിയ കുറ്റകൃത്യങ്ങള്‍ അന്വേഷിക്കുക, പോക്‌സോ കേസുകളിലെ കുറ്റവാളികളെ അറസ്റ്റ് ചെയ്യുക, എല്ലാ റാങ്കുകളിലുമുള്ള ഉദ്യോഗസ്ഥരെ സഹായിക്കുക, സൈന്യത്തിന് ആവശ്യമുള്ളപ്പോള്‍ പൊലീസ് സഹായം നല്‍കുക തുടങ്ങിയവയാണ് ഇവരുടെ പ്രധാന ചുമതലകള്‍.



കന്‍േറാണ്‍മെന്റുകള്‍, സേനാ ആസ്ഥാനങ്ങള്‍, സൈനിക വാഹനങ്ങളുടെ നീക്കം തുടങ്ങിയവക്ക് സുരക്ഷയൊരുക്കുന്നതും കരസേനയുടെ മിലിട്ടറി പൊലീസ് വിഭാഗമാണ്.

യുദ്ധമുണ്ടാകുമ്പോള്‍ യുദ്ധത്തിലേര്‍പ്പെടുന്നവരെ കൃത്യസ്ഥലത്ത് എത്താന്‍ സഹായിക്കുക, യുദ്ധത്തടവുകാരെ പാര്‍പ്പിക്കുന്നതിനുള്ള പ്രത്യേക ക്യാമ്പുകള്‍ നടത്തുക, പ്രശ്നബാധിത പ്രദേശങ്ങളില്‍ സൈന്യം തിരച്ചില്‍ നടത്തുമ്പോള്‍ സ്ത്രീകളെ പരിശോധിക്കുക, അതിര്‍ത്തികളില്‍ പ്രശ്നങ്ങളുണ്ടാകുമ്പോള്‍ താമസക്കാരെ ഒഴിപ്പിക്കുക, അഭയാര്‍ഥി സംഘങ്ങളെ നിയന്ത്രിക്കുക തുടങ്ങിയവ വനിതാ മിലിട്ടറി പൊലീസിന്റെ ഡ്യൂട്ടിയായിരിക്കും.

ഇത്തരം കാര്യങ്ങളിലും ആയുധ പരിശീലനവും ഫിസിക്കല്‍ പരിശീലനവും ഉള്‍പ്പെടെയാണ് പരിശീലന കാലയളവില്‍ നല്‍കുന്നത്.

പുരുഷ മിലിട്ടറി പൊലീസ് ചെയ്യുന്ന എല്ലാ ജോലിയും വനിതാ മിലിട്ടറി പൊലീസും ചെയ്യും. യൂനിഫോമിലും മറ്റു കാര്യങ്ങളിലും മാറ്റമില്ല. പരിശീലനം പൂര്‍ത്തിയാകുമ്പോള്‍ വിവിധ ഡിവിഷനുകളില്‍ ഇവരെ നിയമിക്കും.