മൊബൈൽ ഫോണിൽ ഗെയിം കളിക്കുന്നത് നിര്‍ത്താന്‍ രക്ഷിതാക്കള്‍ ആവശ്യപ്പെട്ടതിന് പിന്നാലെ ഏഴാം ക്ലാസ് വിദ്യാര്‍ത്ഥി കെട്ടിടത്തിന് മുകളില്‍ നിന്ന് ചാടി മരണപെട്ടു. നോയിഡയിലെ സെക്ടര്‍ 110 ല്‍ ഫെയ്സ് 2 പൊലീസ് സ്റ്റേഷന്‍ പരിധിയിലാണ് സംഭവത്തെ നടന്നത്.

ബുധനാഴ്ച്ച രാത്രി മൊബൈലില്‍ കളിച്ചിരുന്ന കുട്ടിയെ അച്ഛനും അമ്മയും വഴക്കു പറയുകയായിരുന്നു. ഇതിനു പിന്നാലെ ദേഷ്യം വന്ന കുട്ടി വീട്ടിൽ നിന്നും ഇറങ്ങി പോയി. തുടർന്ന് ബുധനാഴ്ച്ച രാത്രി 8 മണിയോടെയാണ് കുട്ടിയെ വീട്ടില്‍ നിന്നും കാണാതായത്.

ഇതിനുശേഷം വീട്ടുകാര്‍ തിരച്ചില്‍ നടത്തിയെങ്കിലും കണ്ടെത്താനായില്ല. വ്യാഴാഴ്ച്ച രാവിലെ വീടിന് സമീപമുള്ള പണി പൂര്‍ത്തിയാകാത്ത കെട്ടിടത്തിന് താഴെ മരിച്ച നിലയിലാണ് മൃതദേഹം കാണുന്നത്. കുട്ടി കെട്ടിടത്തില്‍ നിന്നും ചാടി മരിച്ചതാകാമെന്ന് അഡീഷണല്‍ ഡപ്യൂട്ടി കമ്മീഷണര്‍ എളമരന്‍ ജി വ്യക്തമാക്കി.

മൃതദേഹം പോസ്റ്റുമോര്‍ട്ടത്തിന് അയച്ചിരിക്കുകയാണ്. സംഭവത്തില്‍ അന്വേഷണത്തില്‍ പുരോഗമിക്കുകയാണെന്നും പൊലീസ് അറിയിച്ചു. സ്ഥലത്തു നിന്നും ഫോറന്‍സിക് വിദഗ്ധരും പരിശോധന നടത്തിയിട്ടുണ്ട്.

അതേസമയം നോയിഡയിലും ഗ്രേറ്റര്‍ നോയിഡ‍യിലും കഴിഞ്ഞ ദിവസം രണ്ട് ആത്മഹത്യകളാണ് റിപ്പോർട്ട് ചെയ്തിരിക്കുന്നത്. 22 ഉം 35 ഉം പ്രായമുള്ള യുവാക്കളാണ് മരിച്ചത്. മൃതദേഹങ്ങള്‍ പോസ്റ്റുമോര്‍ട്ടത്തിനായി അയച്ചിരിക്കുകയാണ്.