വിവാഹം കഴിക്കാനായി നിർബന്ധിച്ച് മതപരിവര്‍ത്തനം നടത്തുന്നവർക്ക് 10 വര്‍ഷം വരെ തടവും അഞ്ചു ലക്ഷം രൂപവരെ പിഴയും ലഭിക്കാവുന്ന കുറ്റമായി പ്രഖ്യാപിക്കുന്ന ബില്ലിന്​ ഗുജറാത്ത്​ നിയമസഭ അംഗീകാരം കൊടുത്തു.

2003ലെ 'ഭീഷണിപ്പെടുത്തിയും പ്രലോഭിപ്പിച്ചും മതംമാറ്റം തടയല്‍ നിയമ'ത്തില്‍ ഭേദഗതി വരുത്തിയാണ്​ ബി.ജെ.പി സര്‍ക്കാര്‍ പുതിയ ബില്‍ കൊണ്ടുവന്നിരിക്കുന്നത്.

ജാമ്യം ലഭിക്കാത്ത കുറ്റമാണിത്​. കൂടാതെ കുറ്റക്കാരെന്ന്​ കണ്ടെത്തിയാല്‍ മൂന്ന്​ വര്‍ഷം മുതല്‍ പത്തു വര്‍ഷം വരെ തടവും അഞ്ചു ലക്ഷം വരെ പിഴയും ലഭിക്കും. വിവാഹം അസാധുവാക്കുവാനും സാധ്യതയുണ്ട്.

ഹിന്ദു പെണ്‍കുട്ടികളെ മതം മാറ്റാന്‍ അന്താരാഷ്​ട്ര സഹായം ലഭിക്കുന്നുണ്ടെന്നും അതു തടയാനാണ്​ നിയമമെന്നും ഗുജറാത്ത്​ ആഭ്യന്തര മന്ത്രി പ്രദീപ്​ സിങ്​ ജഡേജ വ്യക്തമാക്കി. നിയമ നിര്‍മാണത്തിന്​ പിറകില്‍ ബി.ജെ.പിയുടെ വര്‍ഗീയ അജണ്ടയാ​ണെന്ന്​ കോണ്‍ഗ്രസ്​ പറഞ്ഞു.

മുസ്​ലിം പെണ്‍കുട്ടികളും ഹിന്ദു യുവാക്കളും വിവാഹിതരായ ഡസനിലധികം വിവാഹ സര്‍ട്ടിഫിക്കറ്റുകള്‍ സഭയില്‍ വെച്ചു കൊണ്ടായിരുന്നു കോണ്‍ഗ്രസ്​ എം.എല്‍.എ ജിയാസുദ്ദീന്‍ ശൈഖിന്‍റെ പ്രതിരോധം. വിവാഹങ്ങള്‍ക്ക്​ പിറകില്‍ മതപരമായ താല്‍പര്യം ഇല്ലെന്നായിരുന്നു അദ്ദേഹത്തിന്റെ വാദം.

എന്നാൽ മതപരിവര്‍ത്തനം നടത്താനായി പ്രലോഭിപ്പിച്ച്‌​ വിവാഹം ചെയ്യുന്ന സംഭവങ്ങള്‍ വര്‍ധിക്കുന്നത്​ തടയാനാണ്​ മതസ്വാതന്ത്ര്യ (ഭേദഗതി) ബില്‍ 2021 കൊണ്ടുവന്നതെന്ന്​ സര്‍ക്കാര്‍ പറഞ്ഞു. പ്രതിപക്ഷമായ കോണ്‍ഗ്രസ്​ ബില്ലിനെ എതിർത്തായിരുന്നു വോട്ട് ചെയ്തത്.