നരേന്ദ്ര മോഡിയുടെ വിശ്വസ്തന് ദേശീയ സുരക്ഷാ ഉപദേഷ്ടാവ് അജിത്ത് ഡോവല് തിരുവനന്തപുരത്ത് എത്തിയത് സുപ്രധാന ഓപ്പറേഷന്റെ മുന്നോടിയായി
ദേശീയ സുരക്ഷാ ഉപദേഷ്ടാവ് അജിത്ത് ഡോവല് തിരുവനന്തപുരത്ത് എത്തിയത് രാജ്യസുരക്ഷയെ ബാധിക്കുന്ന സുപ്രധാന ഓപ്പറേഷന്റെ മുന്നോടിയാണെന്ന് സൂചന. തമിഴ്നാട്ടിലെ തീരസംരക്ഷണ സേനാ കമാന്ഡര്, ക്യൂ ബ്രാഞ്ച് മേധാവി, നാവികസേനാ ഉദ്യോഗസ്ഥര്, ഇന്റലിജന്സ് മേധാവി തുടങ്ങിയവരുമായി കന്യാകുമാരിയില് ഡോവല് കൂടിക്കാഴ്ച നടത്തി. തമിഴ്നാട്ടില് രണ്ട് ദൗത്യങ്ങളായിരുന്നു ഡോവലിന്. ശ്രീലങ്ക വഴിയുള്ള ആയുധക്കടത്തിന്റെ ഇടത്താവളമായ തമിഴ്നാട്ടിലെ കൊടിയക്കാരൈ മത്സ്യബന്ധന തുറമുഖത്തെ രഹസ്യ ഓപ്പറേഷനാണ് ഒന്ന്. രണ്ടാമത്തേത് അതിര്ത്തിക്കപ്പുറത്തേതും കൂടുതല് രഹസ്യാത്മകവുമാണ്. പാകിസ്ഥാന് കരസേനാമേധാവി റഷീല് ഷരീഫ് കൊളംബോയിലെ ശ്രീലങ്കന് സേനാ ആസ്ഥാനത്തെത്തിയതിന് തൊട്ടുപിന്നാലെയാണ് ഡോവല് കന്യാകുമാരിയില് പറന്നെത്തിയത്.
ശ്രീലങ്കയിലെയും തമിഴ്നാട്ടിലെയും ഐ.ബി, റാ ഉദ്യോഗസ്ഥര് കന്യാകുമാരിയിലും തിരുവനന്തപുരത്തുമായി ഡോവലിനെ കണ്ടു.
രാജ്യത്തിന്റെ സുരക്ഷാ മേല്നോട്ടമുള്ള ഡോവല് സ്വകാര്യ ചടങ്ങിനെന്ന മട്ടിലാണ് വന്നത്. കന്യാകുമാരിയില് വിവാഹചടങ്ങുണ്ടെന്നാണ് പൊലീസ് പറഞ്ഞതെങ്കിലും ഞായറാഴ്ച രാത്രി മുഴുവന് തിരക്കിട്ട കൂടിക്കാഴ്ചകളിലായിരുന്നു ഡോവല്. കൊടിയക്കാരൈ തുറമുഖം വഴി ചൈനീസ് സഹായത്തോടെ പാക് ചാര ഏജന്സിയായ ഐ.എസ്.ഐ വന്തോതില് ആയുധങ്ങള് കടത്തുന്നു എന്ന് ദേശീയ അന്വേഷണ ഏജന്സി (എന്.ഐ.എ) ഡോവലിനെ അറിയിച്ചത് കഴിഞ്ഞ മാസമാണ്. കഴിഞ്ഞ ആഴ്ച പാക് സേനാമേധാവി ശ്രീലങ്കയിലെത്തി ലങ്കന് സേനാ മേധാവിയെ കണ്ടു. അതിന് പിന്നാലെ ഡോവല് ഇവിടെ എത്തിയതാണ് ശ്രദ്ധേയം.
ശ്രീലങ്കയിലെ റാ, ഐ.ബി ഉദ്യോഗസ്ഥരില്നിന്ന് ഡോവല് വിവരങ്ങള് ശേഖരിച്ചതായും തീരമേഖലയിലുടനീളം അതിജാഗ്രത പുലര്ത്താന് കോസ്റ്റ്ഗാര്ഡിന് നിര്ദ്ദേശം നല്കിയെന്നും അറിയുന്നു. ഇന്നലെ വൈകിട്ട് 5.55നുള്ള ഇന്ഡിഗോ വിമാനത്തില് ഡോവല് ഡല്ഹിയിലേക്ക് പറന്നു.
കേരളവുമായി ബന്ധപ്പെട്ട് ഡോവലിന്റെ ഓപ്പറേഷന് ആദ്യമല്ല. ഐസിസ് ഭീകരരുടെ പിടിയിലായിരുന്ന അന്പതിലേറെ മലയാളി നഴ്സുമാരെ ഇറാഖിലെ തിക്രിത്തില് നിന്ന് രക്ഷിച്ച് കേരളത്തില് എത്തിച്ചത് 1968 ബാച്ച് കേരള കേഡര് ഐ.പി.എസ് ഉദ്യോഗസ്ഥനായ ഡോവലിന്റെ മിടുക്കിലായിരുന്നു. ഐസിസുമായി അടുപ്പമുള്ള സുന്നിനേതാക്കളുമായി ബന്ധപ്പെട്ടായിരുന്നു ഡോവലിന്റെ ഓപ്പറേഷന്. യെമനിലും ലിബിയയിലും കുടുങ്ങിയ നഴ്സുമാരെ രക്ഷിച്ചതിലും ഡോവലിന് പങ്കുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
