ആന്ധ്രാപ്രദേശില്‍ യുവാവിനെ ഭാര്യയുടെ കാമുകന്‍ മകന്റെ മുന്നിലിട്ട് കൊലപ്പെടുത്തി. തമിഴ്‌നാട് സ്വദേശിയായ ഗാന്ധിയെയാണ് (45) ഭാര്യ രാസാത്തിയുടെ കാമുകനായ നരസിംഹലു അഞ്ച് വയസുകാരനായ മകന്റെ മുന്നില്‍ വെച്ച് തലക്കടിച്ച് കൊലപ്പെടുത്തിയത്.

തിങ്കളാഴ്ച രാത്രി ബോയക്കോണ്ട യേനാഡിപാളയത്തെ വനമേഖലയിലായിരുന്നു സംഭവം. അടുത്തിടെയാണ് തിരുപ്പതി സ്വദേശിയായ ഗാന്ധിയെയും മകനെയും ഉപേക്ഷിച്ച് ഭാര്യ രാസാത്തി കാമുകനായ നരസിംഹലുവിനൊപ്പം ഇറങ്ങി പോയത്. ഭാര്യയെ കാണാതായതോടെ അവരെ അന്വേഷിച്ചാണ് ഇയാള്‍ ആന്ധ്രാപ്രദേശില്‍ എത്തുന്നത്. തുടര്‍ന്ന് രാസാത്തി അന്നമയ്യ ജില്ലയില്‍ ഉണ്ടെന്നു മനസിലാക്കി ഗാന്ധി മകനുമായി ഇവിടെ എത്തുകയായിരുന്നു.

അങ്ങനെ അന്വേഷണത്തിനൊടുവില്‍ ഗാന്ധി ഭാര്യയുടെ കാമുകനായ നരസിംഹലുവിനെ നേരിട്ടുകണ്ടു. തുടര്‍ന്ന് ഇയാള്‍ രാസാത്തിയെ കണ്ടുപിടിക്കാന്‍ സഹായിക്കാമെന്ന് പറഞു ഗാന്ധിയെയും മകനെയും വനമേഖലയിലേക്ക് കൊണ്ടുപോവുകയായിരുന്നു. നരസിംഹലുവിന് ഒപ്പം രണ്ട് കൂട്ടാളികളും ഉണ്ടായിരുന്നു. തുടര്‍ന്ന് നരസിംഹലു ഗാന്ധിയെ കല്ലുകൊണ്ട് തലയ്ക്കടിച്ച് കൊലപ്പെടുത്തുകയായിരുന്നു. അഞ്ചുവയസ്സുള്ള മകന്റെ മുന്നിലിട്ടായിരുന്നു കൊടും ക്രൂരത.

അച്ഛനെ ഉപദ്രവിക്കുന്ന കണ്ട കുട്ടി ഓടി രക്ഷപെട്ടു കുറ്റികാട്ടില്‍ ഒളിച്ചിരിക്കുകയായിരുന്നു. ശേഷം പ്രതികള്‍ അവിടുന്ന് പോയ ശേഷം രാത്രി മുഴുവന്‍ അഞ്ചുവയസ്സുകാരന്‍ അച്ഛന്റെ മൃതദേഹത്തിനൊപ്പം കാട്ടില്‍ കഴിഞ്ഞു. പിറ്റേ ദിവസം രാവിലെ കാട്ടില്‍ നിന്നും കുട്ടി പുറത്തെത്തി ഗ്രാവവാസികളോട് വിവരം പറഞ്ഞതോടെയാണ് ക്രൂര കൊലപാതകം പുറത്തറിഞ്ഞത്.

കൊലപാതകത്തിന് ശേഷം രക്ഷപെട്ട പ്രതി നരസിംഹലുവിനെയും ഇയാളുടെ രണ്ടുകൂട്ടാളികളെയും പൊലീസ് കസ്റ്റഡിയിലെടുത്തിട്ടുണ്ട്. ചോദ്യം ചെയ്യലിന് ശേഷം മാത്രം കൂടുതല്‍ കാര്യം അറിയാന്‍ സാധിക്കു.