മദര് തെരേസയുടെ പിന്ഗാമിയായ സിസ്റ്റര് നിര്മല ഇനി ഓര്മ്മ: എതിര്പ്പുകള് അവഗണിച്ച് കടന്നുവന്നത് ബ്രാഹ്മണകുടുംബത്തില് നിന്നും
അശരണര്ക്ക് അത്താണിയായി മാറി ലോകം മുഴുവന് അമ്മ എന്ന് അഭിസംബോധന ചെയ്ത മദര്തെരേസയുടെ പിന്ഗാമി വിടപറഞ്ഞു. മിഷണറീസ് ഓഫ് ചാരിറ്റീസിന്റെ സുപ്പീരിയര് ജനറല് ആയിരുന്ന സിസ്റ്റര് നിര്മലയാണ് അന്തരിച്ചത്. കൊല്ക്കത്തയിലായിരുന്നു അന്ത്യം. ഹിന്ദു കുടുംബത്തില് ജനിച്ച സിസ്റ്റര് നിര്മലയ്ക്കു വിദ്യാഭ്യാസം ലഭിച്ചത് പട്നയിലെ ക്രിസ്ത്യന് മിഷനറികളില് നിന്നാണ്. ആ സമയങ്ങളില് മദര് തെരേസയുടെ സേവനങ്ങളെക്കുറിച്ച് അറിഞ്ഞാണ് അതില് പങ്കുചേര്ന്നു പ്രവര്ത്തിക്കാന് ആഗ്രഹിച്ചത്. ക്രിസ്ത്യന് മതവിശ്വാസത്തിലേക്കു പരിവര്ത്തിതയായ നിര്മല 17ാം വയസ്സില് മദര് തെരേസ സ്ഥാപിച്ച മിഷനറീസ് ഓഫ് ചാരിറ്റിയില് ചേര്ന്നു.
1934 ജൂലൈ 23ന് റാഞ്ചിയില് ബ്രാഹ്മണകുടുംബത്തിലാണ് സിസ്റ്റര് നിര്മലയുടെ ജനനം. നേപ്പാളില് നിന്നുള്ളവരാണ് മാതാപിതാക്കള്. പിതാവ് ബ്രിട്ടീഷ് കരസേനയിലെ സൈനികനായിരുന്നു.
രാജ്യത്തിനു നല്കിയ സേവനങ്ങള് കണക്കിലെടുത്ത് 2009 ല് രാജ്യം നിര്മല ജോഷിക്ക് പത്മ വിഭൂഷണ് നല്കി ആദരിച്ചു. സിസ്റ്റര് നിര്മലയുടെ നിര്യാണത്തില് പശ്ചിമ ബംഗാള് മുഖ്യമന്ത്രി മമത ബാനര്ജി അനുശോചനം അറിയിച്ചു.
മദര് തെരേസയുടെ പിന്ഗാമിയായി 1997ലാണ് സിസ്റ്റര് നിര്മല സുപ്പീരിയര് ജനറലായി ചുമതലയേറ്റത്. 2009ല് ചുമതല ഒഴിഞ്ഞു. അമ്മയുടെ തത്ത്വങ്ങളില് നിന്നും അണുവിട മാറാതെ എല്ലാം കൃത്യമായി ചെയ്യാന് സിസ്റ്റര് ശ്രദ്ധിച്ചിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
