കരിപ്പൂര്‍ വിമാനത്താവളത്തിന്റെ സുരക്ഷക്ക് നിയോഗിച്ചിരുന്ന സിഐഎസ്എഫ് ഭടന്‍മാര്‍ തന്നെ അവിടെ അഴിഞ്ഞാട്ടം നടത്തിയ സംഭവം സേനക്കുണ്ടാക്കിയ മാനക്കേട് ചില്ലറയല്ല. അതിനു പിന്നാലെയാണ് സേനയില്‍ നിന്നും വിമാനത്താവള സുരക്ഷ മാറ്റണെമെന്ന ആവശ്യം ശക്തമായത്. ഇതിനെ അനുകൂലിച്ചും പ്രതികൂലിച്ചും വാര്‍ത്തകള്‍ വന്നിരുന്നു. സംസ്ഥാനത്തെ മൂന്ന് എയര്‍പോര്‍ട്ടുകളുടെയും സുരക്ഷഏറ്റെടുക്കാന്‍ കേരള പൊലീസ് തയാറാണെന്ന് ആഭ്യന്തര മന്ത്രി രമേശ് ചെന്നിത്തലയും പറഞ്ഞിരുന്നു. ഏതായാലും അതിനെയെല്ലാം തള്ളിക്കൊണ്ട് വിമാനത്താവള സുരക്ഷയ്ക്ക് പ്രത്യേക സേന വേണ്ടെന്ന് ബിസിഎസ് വ്യക്തമാക്കി. ബ്യൂറോ ഓഫ് സിവില്‍ ഏവിയേഷന്‍ സെക്യൂരിറ്റിയുടെ റിപ്പോര്‍ട്ടിന്റെ അടിസ്ഥാനത്തിലാണ് ബിസിഎസ് ഇക്കാര്യം വ്യക്തമാക്കിയത്. സിഐഎസ്എഫിന്റെ പ്രവര്‍ത്തന പരിചയം അവഗണിക്കാനാവില്ലെന്നും പുതിയ സേന ഇപ്പോഴത്തെ സാഹചര്യത്തില്‍ പ്രായോഗികമല്ലെന്നമാണ് ബിസിഎസിന്റെ വാദം .
അതേസമയം കരിപ്പൂരില്‍ അറസ്റ്റിലായ എല്ലാവരും സസ്‌പെന്‍ഷനിലായെന്നാണ് സിഐഎസ്എഫ്. 55 ലക്ഷം രൂപയുടെ നഷ്ടമെന്ന റിപ്പോര്‍ട്ട് ശരിയല്ലെന്നും സിഐഎസ്എഫ് പറയുന്നു. വിമാനത്താവളത്തിലെ ആകെ നഷ്ടം 30,000 രൂപയുടേത് മാത്രം. പാര്‍ലമെന്ററി സമിതി ഈ വിഷയം ചര്‍ച്ച ചെയ്യുമെന്നുമാണ് റിപ്പോര്‍ട്ട്. കരിപ്പൂര്‍ സംഭവത്തിന്റെ പശ്ചാത്തലത്തില്‍ വിമാനത്താവള സുരക്ഷയില്‍നിന്ന് സിഐഎസ്എഫിനെ ഘട്ടം ഘട്ടമായി പിന്‍വലിക്കണമെന്ന നിര്‍ദേശം വ്യോമയാന മന്ത്രാലയം മുന്നോട്ട് വച്ചിരുന്നു.
കരിപ്പൂരില്‍ സിഐഎസ്എഫും എയര്‍പോര്‍ട്ട് അതോറിറ്റി ഒഫ് ഇന്ത്യയുടെ കീഴിലെ ജീവനക്കാരും തമ്മിലുണ്ടായ സംഘര്‍ഷത്തില്‍ സിഐഎസ്എഫ് ജവാന്‍ മരിച്ചിരുന്നു. പ്രശ്‌നങ്ങള്‍ക്ക് തുടക്കമിട്ടത് ഫയര്‍ഫോഴ്‌സ് ഉദ്യോഗസ്ഥരായിരുന്നെങ്കിലും ഭടന് വെടിയേറ്റതോടെ ജവാന്‍മാര്‍ അക്രമം അഴിച്ചുവിടുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha