വസുന്ധരയുടെ കുരുക്ക് മുറുകുന്നു. നിലപാട് കടുപ്പിച്ച് കോണ്‍ഗ്രസ്. മുന്‍ ഐ.പി.എല്‍ കമ്മീഷണര്‍ ലളിത് മോഡിയുടെ കുടിയേറ്റ അപേക്ഷയെ പിന്തുണച്ച് നല്‍കിയ സത്യവാങ്മൂലത്തിലെ ഒപ്പ് തന്റേത് തന്നെയെന്ന് രാജസ്ഥാന്‍ മുഖ്യമന്ത്രി വസുന്ധരരാജെ സിന്ധ്യ. ബി.ജെ.പിയുടെ ഉന്നത നേതൃത്വത്തോട് അവര്‍ ഇക്കാര്യം സമ്മതിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. സുഹൃത്ത് എന്ന നിലയില്‍ വ്യക്തിപരമായാണ് ഒപ്പിട്ടത്. ഔദ്യോഗിക പദവി ദുരുപയോഗം ചെയ്തിട്ടില്ലെന്നുമാണ് വസുന്ധരരാജെയും വാദം. പാര്‍ട്ടി നേതൃത്വത്തിന് വിശദീകരണം നല്‍കിയതോടെ വസുന്ധരരാജെ രാജി നല്‍കിയേക്കുമെന്ന അഭ്യൂഹം ശക്തമായിരിക്കുകയാണ്.
ഒപ്പിട്ടത് താന്‍ തന്നെയെന്ന് വസുന്ധരരാജെ സമ്മതിച്ചതിനെ തുടര്‍ന്ന് കോണ്‍ഗ്രസ് നിലപാട് കടുപ്പിച്ചു. വസുന്ധരരാജെയുടെ രാജിയല്ലാതെ മറ്റൊന്നും അംഗീകരിക്കില്ലെന്ന നിലപാടിലാണ് കോണ്‍ഗ്രസ്. വസുന്ധരരാജെ നിയമലംഘനം നടത്തിയെന്നത് ബി.ജെ.പി നേതൃത്വത്തിനും വ്യക്തമായിരിക്കുകയാണെന്ന് കോണ്‍ഗ്രസ് നേതാവ് സച്ചിന്‍ പൈലറ്റ് പറഞ്ഞു. അതേസമയം രാജി സംബന്ധിച്ച് ബി.ജെ.പി നേതൃത്വത്തില്‍ ആശയക്കുഴപ്പം നിലനില്‍ക്കുന്നതായാണ് റിപ്പോര്‍ട്ട്.
2011ലാണ് വസുന്ധരരാജെ മോഡിക്കായി സത്യവാങ്മൂലത്തില്‍ ഒപ്പിട്ടത്. ബ്രിട്ടീഷ് കോടതിയില്‍ സമര്‍പ്പിച്ച രേഖയുടെ പകര്‍പ്പ് കഴിഞ്ഞ ദിവസം കോണ്‍ഗ്രസ് പുറത്തുവിട്ടിരുന്നു. മോഡിക്ക് അനുകൂലമായി താന്‍ ഒരു രേഖയും നല്‍കിയിട്ടില്ലെന്ന വസുന്ധരരാജെയുടെ മുന്‍ വാദമാണ് ഇതോടെ പൊളിയുന്നത്. യു.കെയില്‍ കുടിയേറ്റ അപേക്ഷ നല്‍കുന്നതിന് വസുന്ധരരാജെ സഹായിച്ചുവെന്ന് ലളിത് മോഡിയുടെ അഭിഭാഷകന്‍ വെളിപ്പെടുത്തിയിരുന്നെങ്കിലും ഒപ്പിന്റെ ആധികാരികതയെ ചോദ്യം ചെയ്ത് വസുന്ധരരാജെ രംഗത്ത് വന്നിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha