നിര്‍ദിഷ്ട പലസ്തീന്‍ രാഷ്ട്രത്തെ ഔദ്യോഗികമായി അംഗീകരിക്കുന്ന ഉടമ്പടിയില്‍ വത്തിക്കാനും പലസ്തീനും ഒപ്പുവച്ചു. 2012 മുതല്‍ പലസ്തീനുമായി നിലവിലുള്ള ബന്ധം നൈയാമികമാക്കുന്ന ഉടമ്പടിയാണിത്. വത്തിക്കാനുവേണ്ടി ആര്‍ച്ച് ബിഷപ്പ് പോള്‍ ഗലാഗറും പലസ്തീനുവേണ്ടി വിദേശകാര്യമന്ത്രി റിയാദ് അല്‍-മാല്‍ക്കിയുമാണ് ഒപ്പുവച്ചത്.

പലസ്തീനില്‍ കത്തോലിക്കാ സഭയുടെ പ്രവര്‍ത്തനസ്വാതന്ത്ര്യം അംഗീകരിക്കുന്ന ഉടമ്പടിയാണിത്. സഭയുടെ അവകാശങ്ങളും പരിരക്ഷകളും ഉടമ്പടിയിലൂടെ ആവര്‍ത്തിച്ചുറപ്പിച്ചതായി വിദേശമന്ത്രി റിയാദ് അല്‍-മാല്‍ക്കി ചൂണ്ടിക്കാട്ടി.

ഇസ്രയേല്‍-പലസ്തീന്‍ വൈരത്തില്‍ അയവുവരുത്താന്‍ ഉടമ്പടി സഹായിക്കുമെന്നു പ്രതീക്ഷിക്കുന്നതായി ആര്‍ച്ച് ബിഷപ് ഗലാഗര്‍ പറഞ്ഞു. എന്നാല്‍ പുതിയ ഉടമ്പടി വത്തിക്കാനുമായുള്ള നയതന്ത്രബന്ധത്തില്‍ വിള്ളല്‍ വീഴ്ത്തുമെന്ന് ഇസ്രയേല്‍ മുന്നറിയിപ്പു നല്‍കി.

ഇസ്രയേല്‍, പലസ്തീന്‍ എന്നീ രണ്ടു രാജ്യങ്ങള്‍ സ്ഥാപിച്ചു പശ്ചിമേഷ്യന്‍ പ്രതിസന്ധിക്കു പരിഹാരം കാണണമെന്ന നിലപാടാണു വത്തിക്കാനുള്ളത്. 2012ല്‍ ഐക്യരാഷ്ട്രസഭ പലസ്തീനെ നിരീക്ഷകരാഷ്ട്രമായി അംഗീകരിച്ചതിനെ വത്തിക്കാന്‍ സ്വാഗതം ചെയ്തത്, ഇസ്രയേല്‍-വത്തിക്കാന്‍ ബന്ധം വഷളാക്കിയിരുന്നു. ഒരു ലക്ഷത്തിലധികം കത്തോലിക്കരാണ് ഇസ്രയേലിലും പലസ്തീനിലും ആയുള്ളത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha