രണ്ടു കാറുകള്, രണ്ടിലും ഓരോ മൃതദേഹങ്ങള്.. ഗംഗ കനാലില്നിന്ന് ചെളി നീക്കിയപ്പോള് കണ്ടത്; മരിച്ചവര് മാസങ്ങള്ക്ക് മുമ്പേ കാണാതായവര്; മൃതദേഹങ്ങളും തിരിച്ചറിഞ്ഞു; രണ്ടു സംഭവങ്ങളിലും വിശദമായ അന്വേഷണം നടത്താന് ഒരുങ്ങി പൊലീസ്
രണ്ടു കാറുകള് രണ്ടിലും ഓരോ മൃതദേഹങ്ങള്. ഉത്തര്പ്രദേശിലെ ഗംഗ കനാലില്നിന്ന് ചെളി നീക്കുന്നതിനിടെ കണ്ടെത്തിയതാണിത്. മുസാഫര് നഗറിലാണ് രണ്ടിടങ്ങളിലായി ഗംഗ കനാലില്നിന്ന് മൃതദേഹങ്ങള് കണ്ടെത്തിയത്. സംഭവത്തിന്റെ ഞെട്ടലിലാണ് അധികൃതര്. കണ്ടെത്തിയത് മാസങ്ങള്ക്ക് മുമ്പ് കാണാതായ രണ്ടു പേരെ. ഒരാളെ കാണാതായത് കഴിഞ്ഞ ജനുവരിയില്. മറ്റൊരാളെ ഫെബ്രവരിയില്.
ബാഗ്ര സ്വദേശിയായ ദില്ഷാദ് അന്സാരി(27)യുടെ മൃതദേഹമാണ് ആദ്യം കനാലില്നിന്ന് കണ്ടെത്തിയത്. നദിയില്നിന്ന് പുറത്തെടുത്ത കാര് പരിശോധിച്ചപ്പോഴാണ് കാറിന്റെ പിന്സീറ്റില് അഴുകിയ നിലയില് മൃതദേഹവും കണ്ടെത്തിയത്. കാറില്നിന്ന് ലഭിച്ച ഡ്രൈവിങ് ലൈസന്സ് കേന്ദ്രീകരിച്ച് നടത്തിയ അന്വേഷണത്തില് മരിച്ചത് ദില്ഷാദ് ആണെന്ന് പൊലീസ് തിരിച്ചറിഞ്ഞു. ഇയാളെ കഴിഞ്ഞ ജനുവരി മുതല് കാണാതായതായി സഹോദരന് പോലീസില് പരാതി നല്കിയിരുന്നു.
കൂട്ടുകാരന്റെ കാറുമായി പോയ ദില്ഷാദിനെ കാണാനില്ലെന്നായിരുന്നു പരാതിയില് പറഞ്ഞിരുന്നത്. യുവാവിന്റെ മൃതദേഹം കണ്ടെത്തിയതോടെ കേസില് വിശദമായ അന്വേഷണം നടത്തിവരികയാണ്. ദില്ഷാദിന്റെ മൃതദേഹം കണ്ടെത്തിയ സ്ഥലത്തുനിന്ന് 55 കിലോ മീറ്റര് മാറി സിഖേദയിലാണ് രണ്ടാമത്തെ കാര് കനാലില്നിന്ന് കണ്ടെത്തിയത്.
വെളുത്ത നിറത്തിലുള്ള ഈ കാറിലും ഒരു മൃതദേഹമുണ്ടായിരുന്നു. കഴിഞ്ഞ ഫെബ്രുവരി മുതല് കാണാതായ ഹരേന്ദ്ര ദത്താത്രെ എന്നയാളാണ് മരിച്ചതെന്ന് പോലീസ് തിരിച്ചറിയുകയും ചെയ്തു. രണ്ടു സംഭവങ്ങളിലും പൊലീസ് വിശദമായ അന്വേഷണം നടത്തിവരികയാണ്. മരിച്ചവരെ കുടുംബാംഗങ്ങള് തിരിച്ചറിഞ്ഞിട്ടുണ്ടെന്നും അന്വേഷണം പുരോഗമിക്കുകയാണെന്നും ഡിവൈ.എസ്.പി. ഹിമാന്ഷു ഗൗരവ് പറഞ്ഞു.
https://www.facebook.com/Malayalivartha
