മുംബൈ ക്രൂയിസ് മയക്കുമരുന്ന് കേസില്‍ പിടിയിലായ രണ്ട് പ്രതികള്‍ക്ക് സെഷന്‍സ് കോടതിയില്‍ നിന്ന് ജാമ്യം ലഭിച്ചു. പിടിയിലായ 20 പേരില്‍ മനീഷ് രാജഗരിയയ്ക്കും അവിന്‍ സാഹുവിനുമാണ് കോടതി ജാമ്യം ലഭിച്ചത്. പ്രത്യേക NDPS കോടതി നിബന്ധനകളോടെയാണ് ഇരുവര്‍ക്കും ജാമ്യം അനുവദിച്ചത്. കേസില്‍ 2.4 ഗ്രാം കഞ്ചാവുമായാണ് 11ാം നമ്ബര്‍ പ്രതി മനീഷ് രാജഗരിയ അറസ്റ്റിലായത്. 50,000 രൂപയുടെ ബോണ്ടിലാണ് ജാമ്യം ലഭിച്ചതെന്ന് മനീഷിന്റെ അഭിഭാഷകന്‍ അജയ് ദുബെ പറഞ്ഞു. അതേസമയം, കേസില്‍ ഒന്നാം പ്രതി ആര്യന്‍ ഖാന്റെ  ജാമ്യാപേക്ഷയില്‍ വാദം നാളെയും തുടരും. ബോംബെ ഹൈക്കോടതിയാണ് ജാമ്യാപേക്ഷ പരിഗണിക്കുന്നത്.

മയക്കുമരുന്ന് ഇടപാടുമായി ബന്ധപ്പെട്ട് പിടിയിലായ ആര്യന്‍ ഖാനും സുഹൃത്തുക്കള്‍ക്കും ഒക്‌ടോബര്‍ 20 ന് മുംബൈയിലെ പ്രത്യേക കോടതി ജാമ്യം അനുവദിക്കാന്‍ വിസമ്മതിച്ചിരുന്നു. തുടര്‍ന്ന് എന്‍ഡിപിഎസ് കോടതിയും ജാമ്യം നിരസിച്ചതോടെയാണ് ആര്യന്‍ ഖാന്‍ ബോംബെ ഹൈക്കോടതിയില്‍ ജാമ്യാപേക്ഷ സമര്‍പ്പിച്ചത്. മുംബൈ ക്രൂയിസ് മയക്കുമരുന്ന് കേസില്‍ ആര്യന്‍ ഖാനുവേണ്ടി ഹാജരായത് ഇന്ത്യയുടെ മുന്‍ അറ്റോര്‍ണി ജനറല്‍ മുകുള്‍ രോത്തഗി  ആണ്. ചൊവ്വാഴ്ച ബോംബെ ഹൈക്കോടതിയില്‍ അദ്ദേഹം നേരിട്ട് ഹാജരായി
ആര്യന്‍ ഖാന്റെ ജാമ്യാപേക്ഷയില്‍ ഹാജരായ മുന്‍ അറ്റോര്‍ണി ജനറല്‍ മുകുള്‍ രോത്തഗി, ആര്യന്‍ ഖാനെ പ്രത്യേക അതിഥിയായി കപ്പലിലേക്ക് ക്ഷണിച്ചുവെന്ന്‌കോടതിയെ അറിയിച്ചത്. 'വിശിഷ്ട അതിഥിയായാണ് ആര്യനെ ക്രൂയിസിലേക്ക് ക്ഷണിച്ചത്. ഒരു സംഘാടകനെപ്പോലെയുള്ള പ്രതീക് ഗബ എന്ന വ്യക്തിയാണ് ആര്യനെയും അര്‍ബാസ് മര്‍ച്ചന്റിനേയും ക്ഷണിച്ചത്. രണ്ടുപേരെയും ക്ഷണിച്ചത് ഒരേ വ്യക്തിയാണ്. ഇരുവരും ഒരുമിച്ച് ക്രൂയിസില്‍ എത്തി', മുകുള്‍ രോത്തഗി കോടതിയില്‍ പറഞ്ഞു.
മുന്‍കൂട്ടി ലഭിച്ച വിവരങ്ങള്‍ പ്രകാരമാണ് NCB ക്രൂയിസില എത്തിയത് എന്ന് മുകുള്‍ രോത്തഗി ചൂണ്ടിക്കാട്ടി. തിരച്ചില്‍ നടത്തിയപ്പോള്‍ ആര്യന്‍ ഖാനില്‍ നിന്ന് ഒന്നും കണ്ടെത്താനായില്ല. കൂടാതെ, ആര്യന്‍ മരുന്ന് കഴിച്ചിട്ടുണ്ടോ എന്ന് അന്വേഷണത്തിന്റെ ഒരു ഘട്ടത്തിലും വൈദ്യപരിശോധന നടത്തിയിട്ടില്ല,' അദ്ദേഹം കൂട്ടിച്ചേര്‍ത്തു.