പാകിസ്താന്‍ ഹൈക്കമ്മീഷന്‍ ചര്‍ച്ചയ്ക്ക് വിളിച്ച ജമ്മു കശ്മീരിലെ വിഘടനവാദി നേതാക്കളെ ഇന്ത്യ വീട്ടുതടങ്കലിലാക്കി. ഹൂറിയത്ത് കോണ്‍ഫറന്‍സ് നേതാക്കളായ സയ്ദ് അലി ഗീലാനി, മിര്‍വായിസ് ഉമര്‍ ഫാറൂഖ്, അബ്ബാസ് അന്‍സാരി, യാസിന്‍ മാലിക്ക്, നയീം ഖാന്‍ എന്നിവരെയാണ് വീട്ടുതടങ്കലിലാക്കിയത്. പാക് സുരക്ഷ ഉപദേഷ്ടാവ് സര്‍താജ് അസീസ് ഈ മാസം 23ന് ഡല്‍ഹിയിലെത്തുന്ന വേളയിലാണ് വിഘടനവാദി നേതാക്കളെ പാക് ഹൈക്കമ്മിഷണര്‍ അബ്ദുള്‍ ബാസിത് ഇവരെ ക്ഷണിച്ചത്. സര്‍താജ് അസീസിനു നല്‍കുന്ന അത്താഴ വിരുന്നിലേക്കും ഇവര്‍ക്ക് ക്ഷണമുണ്ടായിരുന്നു. ക്ഷണം സ്വീകരിക്കുന്നതായി ഹൂറിയത്ത് നേതാക്കളും അറിയിച്ചിരുന്നു.
ഇന്ത്യയുടെ കടുത്ത എതിര്‍പ്പ് അവഗണിച്ചാണ് പാകിസ്താന്‍ ഹൂറിയത്ത് നേതാക്കളെ ചര്‍ച്ചയ്ക്ക് ക്ഷണിച്ചത്. കഴിഞ്ഞവര്‍ഷം സെപ്തംബറില്‍ ഇന്ത്യ പാക് വിദേശകാര്യ സെക്രട്ടറിതല ചര്‍ച്ച നടക്കാനിരിക്കേ പാക് ഹൈക്കമ്മിഷണര്‍ ഹൂയത്ത് നേതാക്കളെ സന്ദര്‍ശിച്ചത് ഇന്ത്യയുടെ കടുത്ത എതിര്‍പ്പിന് ഇടയാക്കിയിരുന്നു. ഇതേതുടര്‍ന്ന് ഇന്ത്യ സെക്രട്ടറിതല ചര്‍ച്ചയില്‍ നിന്ന് പിന്മാറുകയായിരുന്നു.
ദേശീയ സുരക്ഷാ ഉപദേഷ്ടാവ് അജിത് ഡോവലുമായി ചര്‍ച്ചയ്ക്കാണ് സര്‍താജ് അസീസ് ഡല്‍ഹിയിലെത്തുന്നത്. പ്രധാനമന്ത്രി നരേന്ദ്ര മോഡിയും പാക് പ്രധാനമന്ത്രി നവാസ് ഷെരീഫും റഷ്യയില്‍ നടത്തിയ കൂടിക്കാഴ്ചയിലാണ് സുരക്ഷാ ഉപദേഷ്ടാക്കളുടെ കൂടിക്കാഴ്ചയ്ക്ക് തീരുമാനമായത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha