ഇന്ത്യയും ഇറ്റലിയും കടല്‍ക്കൊല കേസിലെ നടപടികള്‍ സെപ്റ്റംബര്‍ 24 വരെ നിര്‍ത്തിവയ്ക്കണമെന്ന് രാജ്യാന്തര ട്രൈബ്യൂണല്‍ വിധിച്ചു. കേസുമായി ബന്ധപ്പെട്ട് ഇരു രാജ്യങ്ങളും പുതിയ റിപ്പോര്‍ട്ട് സമര്‍പ്പിക്കണം. ഈ റിപ്പോര്‍ട്ട് പരിഗണിച്ച ശേഷം കേസില്‍ അന്തിമവിധി പറയുമെന്നും ട്രൈബ്യൂണല്‍ ഉത്തരവിട്ടു. നാവികരെ വിട്ടുകിട്ടണമെന്ന് ആവശ്യപ്പെട്ട് ഇറ്റലി സമര്‍പ്പിച്ച ഹര്‍ജി പരിഗണിച്ചാണ് ട്രൈബ്യൂണലിന്റെ നടപടി. കേസില്‍ ഇറ്റലി ഉയര്‍ത്തിയ വാദങ്ങളൊന്നും അംഗീകരിക്കാന്‍ ട്രൈബ്യൂണല്‍ തയാറായില്ല. ഇറ്റലിയുടെ വാദം തെറ്റിദ്ധാരണാജനകമാണെന്നും ട്രൈബ്യൂണല്‍ നിരീക്ഷിച്ചു.

ഇറ്റാലിയന്‍ നാവികരുടെയോ ഇറ്റലിയുടെയോ ആത്മാഭിമാനത്തെ ചോദ്യം ചെയ്യുന്ന ഒരു നടപടിയും ഇന്ത്യയുടെ ഭാഗത്തു നിന്നും ഉണ്ടായിട്ടില്ല. കേസ് ഇന്ത്യ മാന്യമായി തന്നെ കൈകാര്യം ചെയ്തു. ഇന്ത്യയുടെ നടപടികളില്‍ വീഴ്ചയൊന്നും സംഭവിച്ചിട്ടില്ലെന്നും ട്രൈബ്യൂണല്‍ പരാമര്‍ശിച്ചു. നാവികരെ വിട്ടുകിട്ടണമെന്നും കേസില്‍ ഇന്ത്യ മറ്റൊരു രാജ്യത്തോട് കാണിക്കേണ്ട ബഹുമാനം കാണിച്ചില്ലെന്നും ആരോപിച്ചാണ് ഇറ്റലി രാജ്യാന്തര ട്രൈബ്യൂണലിനെ സമീപിച്ചത്. കേസില്‍ വിചാരണ നടത്താന്‍ ഇന്ത്യയ്ക്ക് അവകാശമില്ലെന്നും രാജ്യന്തര നിയമം അനുസരിച്ചാണ് വിചാരണ നടത്തേണ്ടതെന്നുമായിരുന്നു ഇറ്റലിയുടെ വാദം. ഈ വാദങ്ങളൊന്നും കോടതി അംഗീകരിച്ചില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha