സെപ്റ്റംബര് രണ്ടിനു ദേശീയ പണിമുടക്ക്
അടുത്ത മാസം രണ്ടിനു നടക്കുന്ന ദേശീയ പണിമുടക്കില് പങ്കെടുക്കുന്ന തൊഴിലാളികളും കുടുംബാംഗങ്ങളും സമരകേന്ദ്രങ്ങളില് രാവിലെ മുതല് വൈകുന്നേരം വരെ 12 മണിക്കൂര് ധര്ണ നടത്തും. ഒന്നിന് അര്ധരാത്രി തുടങ്ങുന്ന 24 മണിക്കൂര് പണിമുടക്കില് കൊച്ചി മെട്രോ നിര്മാണത്തൊഴിലാളികള്, ഐടി ജീവനക്കാര്, പ്രത്യേക സാമ്പത്തിക മേഖലയില് പണിയെടുക്കുന്നവര് തുടങ്ങി മുഴുവന് തൊഴിലാളികളും പങ്കെടുക്കുമെന്നു സംയുക്ത ട്രേഡ് യൂണിയന് സമിതി പ്രസിഡന്റ് എളമരം കരീമും സെക്രട്ടറി ആര്. ചന്ദ്രശേഖരനും പത്രസമ്മേളനത്തില് അറിയിച്ചു.
അവശ്യസര്വീസുകള് ഒഴികെയുള്ള വാഹനങ്ങള് നിരത്തിലിറക്കുന്നത് ഒഴിവാക്കണം. പത്രം, പാല്, ആംബുലന്സ് പോലുള്ള അത്യാവശ്യ സര്വീസുകള്ക്കു പണിമുടക്ക് ബാധകമായിരിക്കില്ല.
എന്നാല് അടുത്ത മാസം രണ്ടിനു നടക്കുന്ന പണിമുടക്കില് റെയില്വേ മേഖലയില്നിന്നുള്ള തൊഴിലാളി സംഘടനകള് പങ്കെടുക്കില്ല. ദേശീയ പണിമുടക്കിനോട് ഐക്യദര്ഢ്യം പ്രകടപ്പിക്കുന്നവരാണു റെയില്വേ മേഖലയിലെ സംഘടനകളെങ്കിലും ഒരു ദിവസം മാത്രമായി റെയില്വേ പണിമുടക്ക് നടത്തുക പ്രായോഗികമല്ലാത്തതിനാലാണ് വിട്ടുനില്ക്കുന്നതെന്നു സംയുക്ത ട്രേഡ് യൂണിയന് സമിതി നേതാക്കള് അറിയിച്ചു. തന്നെയുമല്ല, റെയില്വേ മേഖലയിലെ സംഘടനകള് നവംബര് 23 മുതല് അനിശ്ചിതകാല സമരത്തിനു നോട്ടീസ് കൊടുത്തിട്ടുമുണ്ട്. പ്രതിരോധ മേഖലയിലെ സംഘടനകളും രണ്ടിലെ സമരത്തില് പങ്കെടുക്കുന്നില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
