നിലവില്‍ പാക്കിസ്ഥാന്റെ ഏക ബാഹ്യശത്രു ഇന്ത്യ മാത്രമാണെന്ന് പാക്ക് സൈന്യം. റാവല്‍പിണ്ടിയിലെ സംയുക്ത സൈനിക ആസ്ഥാനത്ത് സന്ദര്‍ശനത്തിനെത്തിയ പാര്‍ലമെന്ററി കമ്മിറ്റിയ്ക്ക് നല്‍കിയ റിപ്പോര്‍ട്ടിലാണ് നിലവില്‍ പാക്കിസ്ഥാന് ഭീഷണി ഉയര്‍ത്തുന്ന ഏക ബാഹ്യശത്രു ഇന്ത്യയാണെന്ന് പരാമര്‍ശമുള്ളത്. ഇരുരാജ്യങ്ങളുടെയും ദേശീയ സുരക്ഷാ ഉപദേഷ്ടാക്കള്‍ അടുത്തിടെ നടത്താനിരുന്ന ചര്‍ച്ച റദ്ദാക്കിയതോടെ പരസ്പര ബന്ധം കൂടുതല്‍ കലുഷിതമായിരിക്കുകയാണെന്നും സൈന്യം നല്‍കിയ റിപ്പോര്‍ട്ടില്‍ പറയുന്നു.
സെനറ്റര്‍ മുഷാഹിദ് ഹുസൈന്‍ സയീദിന്റെ നേതൃത്വത്തിലുള്ള സെനറ്റ് ഡിഫന്‍സ് കമ്മിറ്റിയ്ക്ക് മുന്‍പാകെയാണ് പാക്ക് സൈനിക നേതൃത്വം ഇക്കാര്യം വ്യക്തമാക്കിയത്. കഴിഞ്ഞ ഏതാനും വര്‍ഷങ്ങള്‍ക്കിടെ ഇന്ത്യ 100 ബില്ല്യണ്‍ യുഎസ് ഡോളറിന്റെ ആയുധങ്ങള്‍ വാങ്ങിക്കൂട്ടിയ കാര്യം ചൂണ്ടിക്കാട്ടിയ പാക്ക് സൈനിക നേതൃത്വം ഇതിലുള്ള ആശങ്കയും സെനറ്റ് അംഗങ്ങളെ അറിയിച്ചു. ഇതില്‍ 80 ശതമാനം ആയുധങ്ങളും ഇന്ത്യ വാങ്ങിയിരിക്കുന്നത് പാക്കിസ്ഥാനെ മാത്രം ലക്ഷ്യമിട്ടാണ്. ഇന്ത്യയുടെ ഈ ആയുധഭ്രമം തുടരുമെന്നും അടുത്ത അഞ്ചു വര്‍ഷത്തിനുള്ളില്‍ വീണ്ടും 100 ബില്യണ്‍ യുഎസ് ഡോളറിന്റെ ആയുധങ്ങള്‍കൂടി ഇന്ത്യ വാങ്ങുമെന്നും പാക്ക് സൈനിക നേതൃത്വം ആശങ്ക പ്രകടിപ്പിച്ചു.
നിലവില്‍ ലോകത്തിലെ ഏറ്റവും വലിയ രണ്ടാമത്തെ ആയുധ ഇറക്കുമതി രാജ്യമായ ഇന്ത്യ കഴിഞ്ഞ ഒരു പതിറ്റാണ്ടിനിടെ പ്രതിരോധ മേഖലയ്ക്കുള്ള വിഹിതം ഇരട്ടിയിലധികമാക്കിയിരുന്നു. ഇന്ത്യയുടെ ഈ വര്‍ഷത്തെ പ്രതിരോധ ബജറ്റ് 40.07 ബില്യണ്‍ യുഎസ് ഡോളറിന്റേതാണെന്നും പാക്ക് ദേശീയ ദിനപത്രമായ ദ ഡോണ്‍ റിപ്പോര്‍ട്ട് ചെയ്യുന്നു. ഇന്ത്യയുടെ ഈ മേഖലയിലെ വളര്‍ച്ച വിലയിരുത്തി അതിനനുസരിച്ച് മറുതന്ത്രം മെനയണമെന്നും സൈനിക നേതൃത്വം സെനറ്റര്‍മാരോട് ആവശ്യപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha