മകന്‍ മിഖായേല്‍ ബോറയെക്കൊല്ലാന്‍ ഇന്ദ്രാണി മുഖര്‍ജി വാടകക്കൊലയാളിയെ ഏര്‍പ്പെടുത്തിയിരുന്നെന്ന് പൊലീസ്. മുംബയ്ക്കാരനായ കൊലയാളിയ്ക്ക് രണ്ടര ലക്ഷത്തിനാണ് ക്വട്ടേഷന്‍ നല്‍കിയത്. പൊളിഞ്ഞുപോയ ഈ പദ്ധതി 2014 ആഗസ്റ്റിലായിരുന്നെന്നും വ്യക്തമായിട്ടുണ്ട്. 
മിഖായേലിനെ കൊല്ലാനുള്ള ഇന്ദ്രാണിയുടെ നാലാമത്തെ ശ്രമമായിരുന്നു ഇത്. വാടകക്കൊലയാളി പിടിയിലായെന്നും ചോദ്യം ചെയ്യലില്‍ ഇയാള്‍ കൊലപാതക ശ്രമം സമ്മതിച്ചതായും പൊലീസ് പറഞ്ഞു. മൂന്ന് തവണ തന്നെ കൊല്ലാന്‍ ശ്രമിച്ചതായി മിഖായേലും പൊലീസിന് മൊഴി നല്‍കിയിട്ടുണ്ട്.
സഹോദരങ്ങളല്ല, മക്കളാണെന്ന സത്യം വെളിപ്പെടുത്തുമെന്നു ഷീനയും മിഖായേലും നിരന്തരം ഭീഷണിപ്പെടുത്തിയിരുന്നതിനാലാണ് ഇരുവരെയും ഇല്ലാതാക്കാന്‍ ഇന്ദ്രാണി മുഖര്‍ജി തീരുമാനിച്ചതെന്നു മുംബൈ പൊലീസ് പറഞ്ഞു. സ്റ്റാര്‍ ഇന്ത്യ മുന്‍ സിഇഒ പീറ്റര്‍ മുഖര്‍ജിയെ വിവാഹം കഴിക്കുമ്പോള്‍ ഷീനയും മിഖൈലും സഹോദരങ്ങളാണെന്നാണ് ഇന്ദ്രാണി പരിചയപ്പെടുത്തിയത്. സത്യം വെളിപ്പെടുത്തുമെന്നു ഭീഷണിപ്പെടുത്തി ഇരുവരും പണം ചോദിക്കുന്നതു പതിവാക്കിയത് ഇന്ദ്രാണിയെ അസ്വസ്ഥയാക്കി.
പീറ്റര്‍ മുഖര്‍ജിക്ക് ആദ്യ ഭാര്യ ഷബ്‌നത്തിലുണ്ടായ മകന്‍ രാഹുല്‍, ഷീനയെ വിവാഹം ചെയ്യാന്‍ തീരുമാനിച്ചതു തന്റെ അധികാരവും സ്വാധീനവും ഇല്ലാതാകാന്‍ കാരണമാകുമെന്ന് ഇന്ദ്രാണി ആശങ്കപ്പെട്ടിരുന്നെന്നും പൊലീസ് പറഞ്ഞു. 
അതിനിടെ, ഇന്ദ്രാണി മുഖര്‍ജി തന്റെ മകളാണെന്നും വളര്‍ത്തുമകളാണെന്ന ആരോപണം ശരിയല്ലെന്നും ഉപേന്ദ്രകുമാര്‍ ബോറ (78) പറഞ്ഞു. ഗുവാഹത്തിയില്‍ ബോറയ്ക്കും ഭാര്യ ദുര്‍ഗാ റാണെ (73)യ്ക്കും ഒപ്പമാണു മിഖൈല്‍ താമസിക്കുന്നത്. അച്ഛന്‍ ഉപേക്ഷിച്ച ശേഷം അദ്ദേഹത്തിന്റെ അനിയന്‍ ഉപേന്ദ്രകുമാറിനെ അമ്മ വിവാഹം ചെയ്തതാണെന്നും ഇയാള്‍ പലവട്ടം തന്നെ പീഡിപ്പിച്ചിട്ടുണ്ടെന്നും ഇന്ദ്രാണി മുന്‍പു പറഞ്ഞതായി റിപ്പോര്‍ട്ടുകളുണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha