കേരളത്തില്‍ മഴ തകര്‍ത്തു പെയ്യുമ്പോള്‍ രാജ്യതലസ്ഥാനം ചുട്ടുപൊള്ളുന്നു.... റെക്കോര്‍ഡ് താപനില രേഖപ്പെടുത്തി ഡല്‍ഹി. വടക്കുപടിഞ്ഞാറന്‍ ഡല്‍ഹിയില്‍ 49.2 ഡിഗ്രിയാണ് താപനില രേഖപ്പെടുത്തിയത്.

നജഹ്ഗാഹില്‍ 49.1 ഡിഗ്രി താപനിലയും രേഖപ്പെടുത്തി. ഉഷ്ണതരംഗം ശക്തിപ്രാപിക്കുന്നതിനാല്‍ രാജ്യത്തെ മിക്കയിടങ്ങളിലും ഓറഞ്ച് അലര്‍ട്ട് പ്രഖ്യാപിച്ചിരിക്കുകയാണ് കേന്ദ്ര കാലാവസ്ഥാ വകുപ്പ്.ഗുരുഗ്രാമിലും ഉയര്‍ന്ന താപനില രേഖപ്പെടുത്തി. 48.1 ഡിഗ്രിയാണ് ഗുരുഗ്രാമിലെ താപനില.

1966-ന് ശേഷം ഗുരുഗ്രാമില്‍ രേഖപ്പെടുത്തുന്ന ഏറ്റവും ഉയര്‍ന്ന താപനിലയാണിത്. ഡല്‍ഹിയില്‍ കുറഞ്ഞ താപനില രേഖപ്പെടുത്തിയത് മയൂര്‍ വിഹാര്‍ ഏരിയയിലായിരുന്നു. 45.5 ഡിഗ്രി സെല്‍ഷ്യസായിരുന്നു ഇവിടെ താപനില രേഖപ്പെടുത്തിയത്.


പാലം ഏരിയയില്‍ 46.6 ഡിഗ്രി താപനിലയും, ആര്യ നഗറില്‍ 46.8 ഡിഗ്രി താപനിലയും സ്പോര്‍ട്സ് കോംപ്ലക്സില്‍ 48.4 ഡിഗ്രി താപനിലയും ഞായറാഴ്ച രേഖപ്പെടുത്തി. തിങ്കളാഴ്ച ഡല്‍ഹിയില്‍ പൊടിക്കാറ്റിനും ഇടിമിന്നലിനും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി.

അതേസമയം സംസ്ഥാനത്ത് ഇന്നും അതിതീവ്ര മഴയ്ക്ക് സാദ്ധ്യത. അഞ്ച് ജില്ലകളില്‍ റെഡ് അലര്‍ട്ട് പ്രഖ്യാപിച്ചു. എറണാകുളം, ഇടുക്കി, തൃശൂര്‍, കോഴിക്കോട്, കണ്ണൂര്‍ ജില്ലകളിലാണ് റെഡ് അലര്‍ട്ട്.

കൊല്ലം, പത്തനംതിട്ട, ആലപ്പുഴ, കോട്ടയം, മലപ്പുറം, വയനാട്, കാസര്‍കോട് ജില്ലകളില്‍ ഓറഞ്ച് അലര്‍ട്ടും, പാലക്കാടും തിരുവനന്തപുരത്തും യെല്ലോ അലര്‍ട്ടും പ്രഖ്യാപിച്ചു.


മണിക്കൂറില്‍ 40 മുതല്‍ 50 കിലോമീറ്റര്‍ വേഗതയില്‍ കാറ്റ് വീശാന്‍ സാദ്ധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. മലയോര മേഖലകളിലും തീരപ്രദേശത്തും അധികൃതര്‍ ജാഗ്രതാ നിര്‍ദേശം നല്‍കി. ദേശീയ ദുരന്തനിവാരണ സേന ഇന്ന് സംസ്ഥാനത്തെത്തും. കേരള, കര്‍ണാടക, ലക്ഷദ്വീപ് തീരങ്ങളില്‍ മത്സ്യബന്ധനത്തിന് വിലക്കേര്‍പ്പെടുത്തി.