സ്വയംനിയന്ത്രിതമായി പറന്നുയര്‍ന്ന വിമാനം കൃത്യമായ ആകാശഗമനത്തിനുശേഷം നിര്‍ദിഷ്ട പാതയില്‍ ഇറങ്ങി. പ്രതിരോധ ഗവേഷണ വികസന കേന്ദ്രം(ഡി.ആര്‍.ഡി.ഒ.) തദ്ദേശീയമായി നിര്‍മിച്ച ആളില്ലാവിമാനത്തിന്റെ (യു.എ.വി.) കന്നിപ്പറക്കല്‍ വിജയകരം.

കര്‍ണാടകയിലെ ചിത്രദുര്‍ഗ പരീക്ഷണ റേഞ്ചില്‍ വെള്ളിയാഴ്ചയാണ് പരീക്ഷണപ്പറക്കല്‍ നടന്നത്. ആളില്ലാവിമാനങ്ങളുടെ വികസനത്തിനും നിര്‍ണായക സൈനിക സാങ്കേതികവിദ്യയില്‍ സ്വയം പര്യാപ്തതയിലും ഇതൊരു നാഴികക്കല്ലാണ്.

'ഓട്ടോണമസ് ഫ്‌ളൈയിങ് വിങ് ടെക്നോളജി ഡെമോണ്‍സ്ട്രേറ്റര്‍' എന്നാണ് ഈ വിമാനം അറിയപ്പെടുന്നത്. ഡി.ആര്‍.ഡി.ഒ.യിലെ വ്യോമവിദ്യാവികസന സ്ഥാപനമാണ് (എ.ഡി.ഇ.) ഈ ആളില്ലാവിമാനം രൂപകല്പന ചെയ്തതും വികസിപ്പിച്ചതും.

വിമാനത്തിന്റെ ചട്ടക്കൂട്, നിയന്ത്രണ- ഇലക്ട്രോണിക്‌സ് സംവിധാനങ്ങള്‍ എന്നിവ തദ്ദേശീയമായി വികസിപ്പിച്ചതാണ്. പ്രതിരോധമന്ത്രി രാജ്നാഥ് സിങ്, ഡി.ആര്‍.ഡി.ഒ. അധ്യക്ഷന്‍ ഡോ. ജി. സതീഷ് റെഡ്ഡി, പ്രതിരോധവകുപ്പ് സെക്രട്ടറി എന്നിവര്‍ ഈ ദൗത്യത്തിനുപിന്നില്‍ പ്രവര്‍ത്തിച്ച സംഘത്തെ അഭിനന്ദിക്കുകയുണ്ടായി.